我發現左我呀哥成日對住部電話講一種我聽唔明既語言: 24.我叫Nir！

「細⋯佬」
當我岩岩開口，我就感受到一雙溫熱既手捉住我隻手，呀言就咁用唔知啲咩就開左我手上既手扣。難怪佢咁冷靜，而家逃脫對佢而言，輕而易舉。

其實我都有不安，心入面諗，或者，呢個都只係一個局，令我自願跟佢走。但，我已經冇野可以再輸啦！縱使成為佢既槍下亡魂，都好過比自己人利用。當我地感受到貨車停定，Lock佢地落左車，細佬就輕易咁開左貨櫃門，我極速帶細佬去車房，上左架吉普車，我坐上駕駛座開車係公路上奔馳而去。當Lock聽到聲趕黎追我地，都已經為時已晚。

我簡吉普車既原因係方便我地橫過沙漠，車一直向南駛就會到沙漠，一方面美軍唔會諗到我地簡咁既路行，另一方面過左沙漠就接近阿拉伯邊境，我地可以再諗我地既去向。而且我係個到有間小木屋，我地可以先係個到安頓一下。

吉普車既設計就係方便係沙漠上行駛，開蓬式既車廂，令熱力唔會困住係車廂入面，而揸普通私家車橫過沙漠，不止唔夠馬力，仲一定會谷死。即使係咁，我地一路暴露係烈日之下，都流左勁多汗，飲左勁多水。車上面冇遮擋，細佬沿路拆左座位既座墊撐左係我頭上，幫我擋太陽。我起初因為佢咁體貼既行為嚇到，但我都另向佢對佢報以微笑以示感謝，但過左冇幾耐，我就笑住推開左佢隻手：「你遮你自己得啦！我冇問題，慣架啦！」佢聽到我咁講，好似有啲失落，將座墊放返好，之後就一直望向車外。呢刻，我有啲疑惑，但心入面都係暖暖既，我覺得我地既關係真係有微妙既改變，或者，我地真係可以一齊安穩咁生活落去。

車高速行駛，到達小木屋既時候已經係夜晚，因為之前間中我都會黎小木屋休息，做一啲私人野，所以木屋入面設備齊全，有床鋪，食物儲備，夠我地係到安頓一個月。呢間小木屋既存在只有我一個人知道，唔係因為我早料到有此一日，只係有時我想一個人靜下，唔想有人打擾，因此有左呢個地方。間屋得一張床，我瞓房，細佬就瞓廳，廳有一張長木椅比佢瞓。瞓之前，我想去個小解，於是準備行出小木屋，廁所就係木屋外面。





「家姐！你去邊？」
「我想去方便一下！」
「使唔使我陪你？」
我望一望出面，外面漆黑一片，伸手不見五指，我笑左笑，明白細佬既意思，再同佢講：「唔使啦！我唔怕，我慣架啦！」
佢又露出失落既表情，返左去長木椅到瞓，但我個心依然係暖既。心入面笑住咁諗：睇黎我唔係一個好家姐，下次要順下佢意先。

「我帶走既係我家姐，從今以後⋯世上再冇Nir呢個人。」
個晚我就夢到細佬同我講既呢番話。
而我，係呢半個月，我先透徹咁明白佢呢句話既意思。





有一次，我地早餐一人有兩隻雞蛋，細佬只係食左蛋白，留底左蛋黃。我見到就笑住咁拎起啲蛋黃，講：「唔食蛋黃呀！我幫你食啦咁！」佢面色一黑：「你唔係好憎食蛋黃既咩！」聽佢咁講，我緩緩放返低手上既蛋黃講：「嗯！」

又有一次，我踩死左隻甲由，用手執起準備將甲由丟出小木屋。
「你又話甲由係世上最噁心既生物，掂都唔想掂！」我迅間嚇到鬆手，隻甲由左落地。

又有一次⋯又有一次
「你中意⋯」、「你好憎⋯」、「你會⋯」、「你⋯唔識」

一切一切好似返返去我岩岩潛入香港既時候，我假扮細佬既家姐，一樣咁膽戰心驚。




一樣咁 · 抑壓。
到呢刻我先明白佢個句說話真正既意思，咩叫「帶走既係佢家姐」，咩叫「世上再冇Nir呢個人」。

*半個月後既一日，我起左身，收埋木棒係背後。細佬見我起左身，笑住咁同我講：「家姐！你起身啦！一齊去河邊玩呀！你唔係好中意既咩？」但我就一棒殿落佢到，兇狠咁講：「我叫Nir !」
「家姐！你做咩呀？」
我再毆：「我叫Nir呀！」
我繼續發狂咁毆細佬，一面癲左咁重覆講：「我叫Nir ！我叫Nir！係Nir 係Nir⋯」直到細佬瞓係地下奄奄一息，一啲反應都冇！*

*「呀！」
驚醒，我手心冒汗，心跳極快，手仲係到震緊。原來只係夢一場，我用手摸摸自己心口，安撫自己受驚既情緒。
此時，我知道我會發呢個夢，係因為我潛意識唔想Nir消失，唔想抑壓自己去扮另一個人。
我諗我知道我應該點做。

#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/