我發現左我呀哥成日對住部電話講一種我聽唔明既語言: 23.從今以後⋯⋯世界上就再冇Nir呢個人

10分鐘之後，整個療養室都響起左警報，所有療養養室既房間都自動打開，大家都行曬出黎，照我地原先既計劃由唔同路線離開。我呆呆咁行出療養室，見到所有成員都爭相走避，而我唔知自己應該何去何從，緊急應變計劃，呀言係潛入我地之中個時，就已經知道得一清二楚，佢一定將呢啲資料比左美軍，而佢地都一定有所部署，所以我地無論點行都一定會成為槍下亡魂。係我猶豫之際，我見到Lock 帶住幾個隊員衝左過黎。
「Nir！一齊走啦！行計劃以外既路線！」
雖然岩岩因爲佢既愚昩間接害死左小七，但如今兵慌馬亂，佢都肯黎救我，確實令我有啲感動。我地幾個避開緊急應變計劃既原定路線，行另一條比較靠隱蔽既路。而呀言竟然早就企係出口等緊我地，但，Lock佢地見到呀言，並唔係同佢用槍對峙，而係將我推向前面，用槍指向我塊面。
Lock對住呀言講：「我知道你想要啲咩！放底槍，如果唔係我就打到佢塊面血肉模糊！」
呢刻，我終於明白，佢地趕黎救我，帶走我，根本唔係因為啲咩義氣，只係希望利用我作為逃走既棋子。我係Lock既槍下冷笑，睇黎我又將自己睇得太重要啦！
Lock見我咁樣，講：「Nir！唔好怪我！我地組織攪到今時今日咁既田地，都係由你造成架！任務失敗不得止，仲為組織帶黎敵人。要你為組織犧牲一下，都好應該姐。」
對於佢呢番話，我無言以對，係我錯，所有野都由我造成，我覺得我最錯，就係加入左「撒旦」。
「唔好！」當呀言緩緩咁放底槍，我竟然脫口而出咁講唔好。為左呢塊面，值得咩？佢就咁放底槍，就會將自己置身係劣勢之中。我望見佢憂心忡忡既眼神，心入面甚至誤會，佢呢份執著係為左我。但佢自己又清唔清楚，佢自己既呢份執著係為左啲咩？聽到我講唔好，佢抬頭向我微笑，但依然放底左槍，就好似真心想救我咁。
～呀言，你而家要做既應該係攞我命，而唔係救我！我想繼續根你！你根本唔應該咁做！～我心入面吶喊，眼泛淚光咁望住佢。
最終，呀言都比Lock捉左做人質，我又對佢地利用我心生不憤，於是佢地幫我地兩個都上左手扣，將我地丟左係貨車後面既貨櫃，鎖左門。之後我就感受到貨車行駛起黎，我諗我知道佢地想去邊。組織基地係兩公里以外都有一個小倉庫，入面有啲車、槍械同錢。佢地應該係想先去個到補充一下物資先再逃走。但我知道，呢一切都係徒勞，組織既大部分主要成員被捕，基地被佔領，「撒旦」已經潰不成軍。即使我地今日成功逃脫，下半生都注定要偷偷摸摸，東躲西藏咁度過。或者，死係呀言手上我會更痛快。貨車係路上飛馳，差唔多5分鐘就會到達倉庫，我亦知道呢個中轉站係我逃走既最後機會。貨櫃內漆黑一片，我同呀言彼此望唔到對方，或者因為咁，我先敢同佢提出咁荒誕既想法。




「言！你係咪癲左？」
「或者啦！但你地做既一切都只會係徒勞！」佢既語氣好平淡，完全了解我地而家走頭無路既處境。
「言！⋯⋯我殺左你世上最重要既人，你都殺左我生命中最重要既人⋯⋯我地打個和。⋯⋯⋯或者⋯⋯從今以後，我地係可以成為彼此最重要既人，我地⋯離開呢到仲可以⋯重新開始。」
係漆黑之中，我聽唔到佢既回應，我都想像等待緊既將會係憤怒同嫌惡既回應。出口後既短短30秒，我已經開始係心底嘲笑自己講出個番愚昧既說話。但佢既回應出乎我意料之外：「我可以不計前嫌帶你走，但我帶走既會係我家姐，並唔係Nir⋯⋯從今以後⋯⋯世界上就再冇Nir呢個人。」
我諗我明白佢既意思，我緩緩開口講出我既答案：「細⋯佬。」
待續～

#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/