我發現左我呀哥成日對住部電話講一種我聽唔明既語言: 11.營救

我即刻衝落街搭的士去搵黃sir。
黃sir搵得我咁急，我諗都同電視上播個單新聞有關。老實講，我唔太緊張，因為我從來未見過有政府會同恐怖分子做交易，美國政府唔會，中國政府唔會，我相信香港政府都唔會。

我地3個幾乎係同時到達相約好既茶餐廳。
黃sir:「你地都睇左新聞？」
我：「其實我諗唔使擔心既，我至今都未見過有邊個政府會同恐怖分子做交易，如果政府真係咁做，一定會引起好大既迴響。」
黃sir暗然咁講：「政府會咁做。」
我安慰黃sir：「點會！每一次恐怖份子利用人質要脅美國政府交贖金，佢都冇交過。就算個個係普通市民，神父，記者定軍人都好。」
黃sir合埋眼絕望咁講：「已經決定左，政府已經決定左。」
我驚訝咁望住黃sir：「冇可能！點解？」




呀穎呢個時候插嘴：「因為個個人質唔係普通人，係有錢人，佢每年比美國政府既錢，比起呢百幾個受害者都有價值。美國政府一定有比壓力香港。」佢語氣中盡是無奈同嘲諷。

「我唔信，我唔信。」
呢個時候電視機上播相關既新聞：「政府剛剛宣布會將幾十名捉到既恐怖分子遺返原地阿拉伯受審。」
呀穎冷笑咁望住電視機講：「用呢種方法就唔怕做成嚴重既迴響。去到阿拉伯個到，就唔係香港政府同恐怖分子做交易，香港政府亦可以置身事外。」
黃sir：「警局個到已經定左聽日將佢地送走。」
「唔可以，唔可以。」我握實拳頭咁講。
點解？點解？要咁對佢地，要佢地死得不明不白。放走兇走就等於再次踐踏受害者既屍體，我家姐既屍體。

「我唔會比佢咁做！」黃sir講。




「你諗住點做？」呀穎
黃sir:「去劫獄。」
呀穎：「你一個人？」
黃sir：「係！」
我：「單人匹馬，你點劫呀？」
黃sir：「佢地決定聽日即刻送佢地走，今次行動想低調，唔會有太多警力既。我知今次恐怖分子轉移既全盤計劃，我知點做。」
我：「預埋我！」
呀穎：「我都係！」
黃sir：「唔好！我都一把年紀，而且個女死之後我就冇人冇物，交比我啦！你地後生仔仲有大把世界，唔好冒險。」
我堅定咁講：「我好清楚咁做既後果係咩！我唔會後悔，我一定要去，我唔會由你一個去冒險架！」




呀穎：「我都係！我都一定要去。」
黃sir見我地咁堅持，貌似同意我地一齊去咁點左下頭。

我爽快咁問：「計劃係點？」
黃sir詳細咁同我地交代左轉調既計劃同我地既佈署。聽日，恐怖分子會分5架大巴運送到機場，我「家姐」，黃sir個「女」，呀穎個「妹」都會係第一架大巴。第一架車上有4個警察，10個恐怖分子。而黃sir係其中一個負責既警察，佢會安排我同呀穎取代兩個警察。到時係車上面，我地3個對一個警案，卓卓有餘。

聽完佢既計劃，我苦惱咁講：「咁樣只攪得掂一架車既人，其他人會照被送去阿拉伯。」我一個都唔想放過，一個都唔想。
黃sir：「我地能力有限，冇辦法。」
我：「黃sir，你做呢行咁耐，識唔識d殺手？」
黃sir：「識係識，但佢地只睇錢做事，冇錢邊個都叫唔郁佢。」
我：「雖然我地冇，但李卓仁（受害者李卓文爸爸，香港十大富之一）有。幾錢？」

我地一齊去左搵李卓仁，同佢講左件事，佢除左係一個有錢人，亦係一個父親，自己個仔慘死，我都知佢一定都唔想眼白白睇住兇手消遙法外。李卓仁係個爽快既人，表明來意之後，佢即刻過左5000萬落我戶口到。我地都同佢講就算我地出事，都只會話筆錢係佢之前捐比受害者既，唔會連累佢。

-------------------------------------





第二朝，黃sir用呀穎係醫院拎既強效安眠藥混左係水比兩個伙計飲，攪掂左佢地。之後，因為要低調，我地連警服都唔使換，著便服戴口罩咁押班恐怖分子上大巴。

「呯！」
上到大巴趁個個唯一既警察唔留意，我一野扑暈左佢。

之後我用支槍指住司機同佢講：「上山。」我要去返我家姐死既地方，用「家姐」既血去祭佢。
黃sir同呀穎則用槍指向班恐怖分子。
我地除低口罩，「家姐」、黃sir個「女」、呀穎個「妹」都即刻認出我地，表現得好驚訝。

「我係唔會比你走架！」我望住「家姐」講。
「你真係夠曬死纏爛打。」「家姐」無奈咁講。
「我只係想幫我家姐攞返屬於佢既野。」我行前用槍指住佢講，逼近佢。因為佢地個個都比手扣鎖住，所以唔使驚。

點知個司機突登轉個急彎，我、黃sir同呀穎都企唔穩，「家姐」唔知幾時脫左手扣，趁我企唔穩一手搶左我支槍，一手扣住我雙手，用槍住我後腦。形勢係短短幾秒入面逆轉。





「家姐」：「放低槍。」
我：「唔好放，我唔怕死。你地幫我攞返家姐塊面，我死而無憾。」
「家姐」語氣強硬咁再講：「放⋯低⋯槍」
我：「唔好！」
「家姐」扣一扣扳機，恐嚇呀穎同黃sir。

佢地慢慢舉起雙手，將槍放係地下，踢左去「家姐」到，其中兩個恐怖分子執起左左。
其中一個男人用槍指住我地講：「等我解決佢地。」
「唔好！」「家姐」好激動好兇狠咁講。
「點解？」男人問。
「今日如果有人流血，我地都唔使指意可以上到飛機。」「家姐」語氣有d嬲，好似怪責緊個男人既無知。

「你坐低。」「家姐」叫黃sir。
「司機呢到停車。」




男人用槍指住黃sir，「家姐」等司機停車之後就用槍逼我同呀穎去門口。
「落車。」佢同我地講。
我同呀穎落左車，道門關埋，「家姐」隔住玻璃同我講：「細佬，後會無期。」
架車駛走既時候，「家姐」都望住我，唔知係咪我既錯覺，我竟然見到「家姐」眼神閃過一絲既悲傷。

「返機場。」「家姐」同司機講。
佢行返埋位，同黃sir笑住咁講：「就等我地一齊做埋呢場戲。今日，我一定要上到飛機。」

我絕望咁目送大巴遠去，撥左一通電話：「喂！攪成點？」

「隊冧左十幾個，警察黎緊，我要撤退啦！」

雖然一早安排左兩個殺手係機場附近用狙擊槍攪掂班恐怖分子，但始終能力有限，最終都只係殺左十幾個。

但政府亦照原定計劃，送曬剩低既恐怖分子上飛機。





------------------------------------

「對唔住，係因為我計劃先會失敗。」我望住黃sir同呀穎講。
「你冇必要道歉。」黃sir講。
「睇黎我真係應該放棄啦！就咁就完啦！」呀穎講，佢既眼神非常空洞。

望住佢地，我心入面已經有個打算，心入面默念：「就算你走到天涯海角，我都要搵你出黎。」

待續


#有興趣歡迎讚黑柴Facebook
https://www.facebook.com/%E9%BB%91%E6%9F%B4-879053098899020/