[有沙入眼]是咁的，我覺得我住嗰度有啲唔妥: 228請你記得

「喂！你地想點呀！」

廢棄工廠大廈之內，一個後生仔被黑布蒙住面，雙手被綁喺木凳後面，搏頭畀兩個黑超西裝友㩒住。

順帶一提，兩個西裝友係我嘅員工。

我行過去抽走佢面上嘅黑布，阿良見到我之後就嚇咗一跳︰「係你？你想點呀？」

佢望吓自己身處嘅環境，倒抽涼氣︰「唔係想殺我滅口卦？喂大佬！有意外我都唔想架喎！」



無錯，無人希望意外發生。

我只係睇唔過眼你對我個妹嘅態度。

「我係斯文人，唔好諗到殺人咁誇張。我只係想介紹個遊戲畀你玩姐。」

我拎出一塊圓形銀色金屬，上面寫住「VR」，形狀有啲耳機。然後將「恐怖體驗」嘅遊戲晶片插入金屬之中，再扭動上面嘅圓輪，將數字調較到「100」。

「依個係……意識植入機？」無錯，係人都知。



阿良試圖掙扎，但係佢根本無能力反抗，結果都係畀我將植入機掛咗喺佢耳仔上面。

「你……你想點呀？」

「你知唔知，如果植入全部意識喺VR世界之後，抆走你個植入機，會發生咩事？」阿良皺眉頭，身體因為恐懼而劇震。

植入機就係現實同虛擬世界之間嘅橋，意識過咗去虛擬世界，但係橋畀人拆走，結果可想而知。

我繼續講︰「其實依件事就唔係好危險架啫，只要有人幫你戴翻部機，你嘅意識就可以登出。」我環視一下只有四個人嘅廢棄工廠大廈︰「但係你估吓依度有無人會幫你戴翻部機吖嗱？」



永遠喺虛擬世界徘徊，同死根本無分別。

「我做錯咩事先？月曦搞成咁真係唔關我事家嘛！」

「我知。」

「知你就講吓道理，尊重吓人嘅自由意志得唔得呀？我真係照顧唔到月曦吖嘛！」

「我知。但我條氣唔順。」

「吓？」

「純粹係覺得你態度差，黑我憎。」

我將手放喺佢耳邊嘅植入機上。



「我唔係嚟講道理，我只係嚟教訓你。」

「教訓⋯⋯我？」

「因為你整喊我個妹。」

失禁嘅尿液流濕地板，阿良淚聲俱下求我放過佢。之前喺病房嘅氣勢蘯然無存。

手指按壓開始制，阿良失去意識，即時垂低頭。

我開手機，用APP連接去恐怖體驗嘅平台，確定入面嘅阿良開始獨自面對遊戲入面嘅怪物同怨靈。

當時喺海底見到，被咬走頭顱嘅片段，就係阿良嘅恐怖紀錄。



西裝友伸手想抆走阿良耳上嘅植入機，但我阻止咗。

「友佢，咁就夠喇。我地走啦。」

話哂佢都係月曦所愛嘅人，我知道如果真係咁做，月曦一定會傷心。教訓咗佢，抒發咗自己啖氣就夠喇。

恐怖體驗嘅通關難度同意識植入嘅份量呈反比關係。將全部意識植入的話，玩家喺遊戲入面就會更加清醒，線索亦會容易記得。所以阿良應該幾個鐘頭之後就會成功通關，自動登出。

不過植入全部意識之後，玩家喺遊戲中感知到嘅時間流動會快十幾二十倍，即係話現實世界嘅一個鐘已經等於虛擬世界廿個鐘。幾個鐘後登出嘅阿良，會覺得自己已經喺被恐怖環境折磨咗幾日。

我用app追蹤阿良嘅意識，確定佢喺嗰晚就通關登出，一共用咗七個鐘頭，即係話佢已經被遊戲折磨咗百幾個鐘頭，而我對佢嘅懲罰亦到此為止。

系統歸還畀阿良嘅回憶，係佢第一次同月曦喺屋企煮飯嘅情景。

「可以咁一齊煮餐飯，真係好幸福。」



「結婚之後就可以日日咁幸福啦傻豬。」

請你唔好忘記，自己曾經愛過一個叫金月曦嘅女仔，曾經諗過同佢結婚，即使你最後選擇離佢而去。

請你記得。

因為我知，月曦仲好鍾意你。

經恐怖體驗強化過嘅記憶更難以忘記，所以，請容許我個妹永遠留喺你嘅記憶之中。