[有沙入眼]是咁的，我覺得我住嗰度有啲唔妥: 229植入植物人意識

好喇，教訓完個仆街仔，跟住落嚟就要做更加難嘅事。

因為月曦已經唔會再醒，所以我唯一嘅願望已經無可能實現。不過現實中做唔到，唔代表VR世界做唔到。

只要可以將佢嘅意識植入，一切妄想都變得有可能實現。

我諗翻喺醫院嗰日，既然月曦聽得到我同阿良嘅對話，所以傷心到流眼淚，咁佢應該仍然有意識去感知世界。

如果有意識，理論上就可以用植入機將意識植入。



當我準備好之後，就嘗試植入月曦嘅意識。點知連線成功嗰刻，大量嘅海水湧入遊戲世界，我即刻將連線中斷，但整個記憶體區域已經被海水淹沒咗。

我當時係完全唔知發生咩事，用咗好一段時間研究先慢慢發現原來係程式漏洞。

因為意識植入嘅對象一直都係得正常人，唔包括植物人，當有異常意識植入遊戲之中，就觸發一連串意料之外嘅運行問題。

由於月曦大腦缺氧受損，同普通人嘅大腦有少少出入，令植入機無辦法偵查到佢腦入面嘅意識。

遊戲系統接收唔到月曦嘅意識，但接收到佢變成植物人前嘅記憶，亦即係喺海中心窒息失救嘅片段，最可怕嘅夢魘。



本來系統應該抽取美好嘅回憶進行扭曲，但依個係對普通正常人嘅情況。對住月曦，遊戲淨係抽取到佢遇難嘅記憶，依個係第一個bug。

而當依段悲劇製成恐怖經歷之後，本來會成為月曦要面對嘅關卡，但佢嘅意識根本唔喺遊戲入面。

結果因為無玩家，系統不停重復製造恐怖經歷嘅程序，依個係第二個bug。當超過負荷，就轉化為海水淹沒一切。

好彩斷線斷得快，唔係的話可能會成個遊戲世界報銷。

以當時嘅科技水平，我無辦法植入月曦嘅意識。



但嗰一刻，我竟然一啲都唔洩氣，反而充滿鬥志。

有bug的話就去清除。

無植入植物人意識嘅技術的話，就去研發出嚟。

極其簡單又痴線嘅諗法。

依個諗法實在太瘋狂，我亦知道只有自己一個人的話根本做唔嚟，問題係過於痴人說夢嘅諗頭，係無可能聚集人心。

一個人無辦法成功，但我無可能要求所有公司嘅員工陪我一齊行依條不歸路。

雖然係咁，我仍然抱有一絲幻想，幻想會有肯陪我嘅同路人，所以公司論壇上先會出現嗰個post。

「如果將而家嘅植入技術改良，令植物人都可以植入意識，大家點睇？」



我喺公司個匿名論壇上面打出依個咁異想天開嘅概念，如我所料，無人支持我。

咁都好正常，因為佢地根本唔知道我背後嘅動機。

就算知道我嘅動機，睇怕都好難理解我嘅做法。