[有沙入眼]是咁的，我覺得我住嗰度有啲唔妥: 215肉色

月曦好似記起我細個同佢講過嘅夢想，笑一笑︰「幫手？」

「諗到咩恐怖野都得，只要覺得恐怖就話我知。見到恐怖故事、恐怖片同恐怖圖都SEND畀我，我用嚟做遊戲入面嘅素材。」

「你諗住整隻GAME出嚟？」

「係呀，整隻VR game出嚟。雖然都仲有好多野唔識要學，但起碼我本身有啲電腦底，學起上嚟會容易啲。」

每日抽出我僅餘嘅時間逐少逐少完成，首先寫好遊戲嘅故事，之後再諗遊戲程式嘅設計。



「遊戲會記錄玩家嘅每一個恐怖故事，一次又一次咁累積通關成功同通關失敗嘅片段。玩家玩完就可以睇翻自己點樣面對恐怖嘅紀錄片，仲可以喺失敗嘅經歷入面搵到通關嘅線索。」

月曦好快就明白，我雖然做唔到導演，但依個係以我嘅能力可以做得到嘅「恐怖電影製作」——喺遊戲入面自編自導。

嗰陣我臨訓前、朝早起身都會同月曦討論點樣可以令遊戲變得更加恐怖。

「恐怖原則就一定要應用喺入面架喇，咁先可以令玩嘅人心寒。」

「係可以令人心寒，但咁樣個故事唔會寫得長架喎。因為人一定會尋求解釋，所以直到最後都唔知係咩嘅怪物，好難一直承受故事發展。」



滿足恐怖原則嘅怪物往往唔多，而一旦解釋咗怪物係咩嚟，人就會無咗入骨嘅恐懼。

「咁就唔好將個故事寫得太長，而係用以前《奇幻潮》嗰種模式，用短篇故事。呀！嗰隻間場嘅野都可以做GAME入面嘅怪物。抄低先。」

「邊隻？」

「踎喺度，對腳向後拗嗰隻綠色野呀。」

「係鬼綠色呀，肉色架。」



我反一反白眼，我記得好清楚《奇幻潮》嘅間場怪物係綠色。但可能嗰陣月曦仲細，「肉色」同「綠色」發音又相近，所以撈亂咗啦。

「好好好，你話肉色就肉色。」

我將筆記上面個「綠」字刪走，寫低「肉色」。我後嚟有上網搵過圖，隻野真係綠色，但我都無改到自己嘅記錄。