[有沙入眼]是咁的，我覺得我住嗰度有啲唔妥: 208相比恐怖，更愛海洋
兩套鬼片嘅上映時間分別係一九九九年同二零零三年，我四歲同八歲，自然無可能自己入戲院睇。阿婆阿公亦無可能會帶我地睇鬼片，因為無錢，就算有都應該帶小朋友去睇卡通片先正路。
雖然細個有機會喺巧合之下睇過鬼片，但真係驚恐怖片的話，點會睇第二齣係人都知會嚇到標屎嘅鬼片？
《午夜凶鈴》係我地機緣巧合之下睇嘅電視重播，見過貞子已經足夠形成童年揮之不去嘅陰影，根本唔駛睇埋《咒怨》。如果我係正常嘅小朋友，睇過《午夜凶鈴》之後，真係驚的話，見到聽到「咒怨」兩隻字，知道係恐怖片一定會迴避，所以睇咗一套就無可能會睇過第二套。
我之所以會睇過依兩套經典鬼片，係因為我主動去睇，我根本就唔驚聽鬼故。即使睇過《午夜凶鈴》同《咒怨》，我亦從來無童年陰影。因為除咗恐懼，我感覺到更加多嘅係恐怖電影嘅刺激。
睇完貞子，仲想睇其他經典嘅日本恐怖片。
《咒怨》，就係我同月曦喺圖書館借嚟睇嘅恐怖片，因為我地想體會更多恐怖電影嘅視覺刺激，所以睇完貞子就去睇伽耶子。
我唔係驚鬼故嘅人。
我係主動去接觸恐怖嘅人。
而月曦，係陪我接觸恐怖嘅人。
不過，無任何人會一直、一直陪住你，就算係親人都一樣。
我知道月曦由好早開始，已經同我唔一樣。因為相比恐怖，佢始終更愛海洋。