[有沙入眼]是咁的，我覺得我住嗰度有啲唔妥: 207矛盾
影像嘅震撼力往往相比文字更強大，睇過恐怖電影，就會知道聽鬼故同睇小說嗰種其實唔係叫恐怖，充其量只係心寒。
貞子爬出嚟嗰吓，真係嚇到個人縮一縮，長髮之間露出嘅駭人墨眼，好似直接將恐懼打入我嘅骨髓之中。
受過嗰日嘅新刺激之後，我同月曦就由書本轉移到另一個媒介去感受恐怖故事嘅刺激。《午夜凶鈴》嘅視覺震撼，令月曦重拾翻睇恐怖故事嘅好奇心。
以視覺體驗恐怖嘅新鮮感，令月曦有咗睇鬼片嘅興趣。我亦開始同月曦借圖書館入面嘅VCD嚟睇，係圖書館借埋電腦睇。
但我地從來無入戲院睇過鬼片。
所以到我有想賺錢嘅概念嗰陣，先會諗到有錢就可以同阿妹去睇戲。喺戲院睇，感覺一定更加正……就係想喺戲院入面睇恐怖片。
到後來真係打工賺錢，亦無同月曦去睇過戲。雖然睇戲對我地嚟講係好奢侈嘅娛樂，我地用錢嘅優先次序表上面，「睇戲」一項永遠排到好後，但如果要去睇點都有錢睇。後來無睇，係因為錢以外嘅原因。
點都好，嗰陣我地又有一段時間一齊睇恐怖片。當時嘅我以為月曦已經重新對恐怖故事有翻全心全意嘅興趣，我真心咁諗。而我相信，起碼最開始嘅時候，月曦真係好似以前咁，重新愛上恐怖。
「阿妹，我地睇依套吖。」
當時手上拎住嘅VCD盒上，清楚寫住兩隻大字。另一部日本經典恐怖電影——《咒怨》。
由一開始就存在嘅矛盾，我總算可以理解得到。
記憶中，喺恐怖體驗中我有過咁樣嘅自白︰「其實我由細到大都好驚聽鬼故，可能因為細個睇過《午夜凶鈴》同《咒怨》，搞到有童年陰影。」
點解我連咁簡單嘅矛盾都察覺唔到？