[有沙入眼]是咁的，我覺得我住嗰度有啲唔妥: 203死守
熱戀期過去，經典嘅作品已經睇哂；質素唔差嘅作品已經睇完；平凡嘅作品已經睇過；太廢嘅作品又唔想睇，就變為平淡期。
當無新嘅刺激之後，唔同人會有唔同嘅反應。
有人會翻睇經典同最鍾意嘅作品；有人會期待新嘅優質製作；有人會去發掘新嘅領域。
睇開漫畫嘅可能會去睇吓動畫；睇開韓劇嘅可能會去睇吓日劇。
當時嘅月曦，再大個咗啲，已經九歲，唔再係淨係識得跟住我去借書嘅細路，佢開始自己去搵有興趣嘅書嚟睇。
我以為就算月曦靠自己嘅意志去搵想睇嘅書，都一定會搵翻恐怖小說嚟睇。但我錯咗，原來喺我不知不覺間，佢對恐怖故事，已經厭咗。
但我，仍然死守喺恐怖故事嘅領域。