[有沙入眼]是咁的，我覺得我住嗰度有啲唔妥: 202熱戀期
後來，我自己會借全文字嘅恐怖小說，但為咗顧及月曦，我會借有多啲插圖同相嘅恐怖故事畀佢睇。
講到底，月曦雖然同我一樣覺得鬼故刺激，不過佢喺鍾意恐怖故事嘅程度上同我有所差別。佢細過我，識嘅字少啲，理解長句字亦會有困難，所以就算我地睇同一個故事，月曦因為理解力不足，無可能感覺到同我一樣的震撼同刺激。
或者因為咁，令月曦對恐怖小說嘅興趣愈嚟愈細。我當時就係察覺到依個問題，所以就借比較多圖嘅書畀佢睇。
「哇，原來有啲咁嘅書？」一向只會好似鴨仔咁跟住我去恐怖小說書架嘅月曦，一直以為所有書都好似小說咁，啲字排到密密麻麻。
「係呀，圖多啲，字少啲，你咪明多啲囉！」
但恐怖故事始終唔係針對小朋友市場，就算有圖片，文字總係佔大多數內容。
日子一日一日咁過，我愈睇愈多，月曦亦愈聽愈多恐怖故事。時間耐咗，睇嘅作品多咗，就會開始睇得出當中嘅套路。正常人喺去到某個臨界點之後，就會失去喺嗰個領域嘅好奇心。
進入一個新領域往往令人異常興奮，譬如中學生接觸動漫嘅世界，然後就會用幾年時間沈浸喺入面，睇以前嘅經典作品，睇新嘅人氣作品。又例如女人接觸韓劇嘅世界之後，又會用好多時間去睇翻出名好睇嘅韓劇，依個階段就係發掘新領域嘅熱戀期。我同月曦當時，對恐怖故事嘅沉迷大約持續咗兩年。