[有沙入眼]是咁的，我覺得我住嗰度有啲唔妥: 201書本
阿婆見我地兩個成日睇書無再打乒乓波，本來以為自己講鬼故嚇得我地太勁，直到有一日好奇望吓我地睇咩書，先發現原來我地愛上咗恐怖故事。不過佢嘅目的已經達成，起碼我地無再夜媽媽出去外面打波，唔駛好似以前咁花咁多心機勸我地翻屋企。加上見睇書又唔係咩不良嗜好，所以就友得我地。
嗰陣時，我睇完一本小說就畀月曦睇。我由最初有字唔識，到後嚟可以流暢咁睇完一本驚悚小說。以一個小學生嚟講，我嘅閱讀量比其他同齡嘅小朋友更加多。而月曦嘅認字能力亦因為成日睇小說而提高。但好多時候，都要我喺佢身邊講幾句輔助吓。
「依度話呀，如果要令人覺得一個鬼故恐怖，入面隻鬼或者怪物就要滿足三個條件。」
其一，恐怖之物唔會死。
其二，恐怖之物唔可以擁有溝通能力。
其三，恐怖之物一定要係直到最後都唔知係乜嚟嘅野。
我就係嗰陣時知道「恐怖原則」。