[有沙入眼]是咁的，我覺得我住嗰度有啲唔妥: 192不安
三個人？唔係，準確啲講，係有三個意識喺遊戲入面。除咗我同月曦，仲有邊個？吳非凡？但佢唔係已經完成淨化登出咗喇咩？
「有⋯⋯第三個人喺度。」如果除咗我同月曦仲有一個人，嗰個人喺遊戲中不斷死，片段被記錄，記憶體好快就會爆滿。
即係話，我同月曦處於極唔安全嘅狀態，因為我地唔知第三人嘅記錄幾時會塞滿系統嘅記憶體。
如果記憶體畀嗰條友嘅體驗記錄塞爆，咁我同月曦就無辦法登出。成唔成功走得甩，關鍵在於唔可以控制嘅第三方。
情況唔受自己掌控嘅不安令我咬住下唇。
月曦走近，見到貝殼上顯示嘅數字：「仲有人喺度？」
吳非凡講過，繼續淨化就可以見翻嘅人，唔通就係依個第三人？
可惡，資訊同線索太少，根本無辦法整理出成件事嘅原貌。
我而家有嘅線索係咩呢？唔⋯⋯我同吳非凡喺現實世界改良意識植入技術，然後我被人植入恐怖體驗世界，吳非凡就將自己植入，入嚟話我知個遊戲要靠共鳴同淨化通關。而只要一直通關，就可以見翻一個人。