[有沙入眼]是咁的，我覺得我住嗰度有啲唔妥: 161只知感覺失了蹤

我多少感覺到發生咩事，Lucy全身好似隱約有種粉紅色嘅氣場包圍佢咁。

「恭喜哂喎。」

「咩呀！」Lucy喺廚房伸個頭出嚟：「佢都未表白，恭咩⋯⋯呀！」佢發覺自己講多咗，就揞住嘴，縮翻個頭入去。

真係無估錯。

恭喜細妹就嚟有拖拍，希望嗰個男仔真係可以令佢開心，拯救佢嘅心靈啦。的確，愛情係可以為佢而家枯燥無味嘅生活添上一啲色彩嘅。



「我要將你拯救，逃離人類荒謬～」Lucy一路洗野一路唱。

「你好鍾意依首歌咩？」

「係呀，好鍾意。阿哥你唔鍾意？」

「我鍾意另一首。另一個組合唱嘅。」

「咩歌？」



「一陣send link畀你。」

「好啦。呀，係喇。」Lucy抹乾手，行出嚟，解開頭上個髻：「阿哥你呢？」

「咩？」

「你搵到你嘅miki未？」

「未呀，得閒死唔得閒病。仲有miki係畀人救嗰個，我家下仲邊有力氣救人吖。」



自己都顧唔掂啦。

我嘆咗口氣，繼續講：「你真係信，愛情會將你拯救？」

「係呀。」

當然，我無話畀Lucy知，〈哪裡只得我共你〉嘅續集，係〈只知感覺失了蹤〉。