[有沙入眼]是咁的，我覺得我住嗰度有啲唔妥: 155蒸發

「阿婆呀，年代唔同架喇，而家大學生一街都係，唔喺你地嗰陣時嗰啲天之驕子嚟架喇。」

佢個年代淨係得港大同中大，平均教育程度都係小學畢業，讀得大學嘅人自然係有家底嘅超級精英。

反觀今日香港，一地都係大學生，入到大學等於飛黃騰達，可以做人中之龍嘅諗法，已經過哂時。

阿婆個樣有啲唔忿氣，走咗去堆免費報紙度係咁搵，搵咗一輪終於拎到一份出嚟，上面寫住：「八萬學生爭萬七大學學位。」

「一街都係就唔駛爭啦。你喺嗰萬七個人入面喎，有得讀梗係讀啦。」



可能老一輩嘅人就係會想後生嗰輩讀多啲書啦，我始終唔太明點解阿婆喺依點上面咁執著。

「好啦好啦，咁我現實啲，邊有錢呀？」

我本身就無入大學嘅強烈慾望，所以好多應該知嘅資訊都唔知。譬如話關窿（grant／loan）可以送錢或者借低息貸款畀窮學生交學費咁，我當時係零個知道。

「阿婆有，阿婆有。」

阿婆隨後話我知，我地屋企一直有拎綜援。雖然每個月唔多，但儲咗好多年，都有可觀嘅幾十萬。



「啲錢本來就係儲嚟畀你同阿妹讀書做醫生或者律師架，阿婆唔知讀大學要幾錢，但咁多應該夠啦？」

我啞口無言。

「有錢喇，讀大學啦去。」

就係咁，我就入咗浸大讀CS，唔係China Studies個CS，係Computer Science個CS。

慶幸嘅係，後來入到大學知道有得申請關窿，所以最後都唔駛用到阿婆舊錢。



而依舊錢，喺一年後就因為阿婆患上子宮頸癌而急速蒸發。