[有沙入眼]是咁的，我覺得我住嗰度有啲唔妥: 154要讀架
Lucy同我一樣，好早出嚟走法律罅做野。
雖然阿婆無用我地啲錢，但起碼我地可以自己賺錢自己使，等阿婆嘅開支少啲，都算幫輕咗佢。
同我唔同嘅係，Lucy無被錢洗腦。起碼喺最後，佢選擇咗陪喺阿婆身邊。
以前嘅我地，未認知到綜援依樣野，所以我地腦入面只有賺錢幫輕屋企一個選擇。
我地認知綜援嗰一日，係我攞公開試成績表嗰日。
「咁考都廿二分。」
最好成績係電腦，拎五星星。其次係中文，有五，靠作文拉高咗平均分。其他科就三三四，不過不失。
因為我平時要打工，於是淨係專攻我最鍾意嘅電腦，其餘兩科被逼選修嘅科我一早就drop咗，所以我一共只係讀五科。
「老師話我依個成績，想入大學讀電腦並唔係太大問題。不過算啦，政府資助學位都四萬蚊一年，四年成十六萬，出嚟做野好過。」阿婆問我考成點，入唔入到大學嗰晚，我如實答咗我心入面嘅諗法。
「唔得！梗係要讀大學啦！」
「吓？但係出嚟做野有錢喎，當我一個月有八千蚊人工，廿個月後就有十六萬喇喎。」
「唔係咁計嘅，唔係咁計嘅。」
「咁點計？」
「阿婆讀得書少點識咁多姐？總之唔係咁計啦。要讀架，要讀架。」