[有沙入眼]是咁的，我覺得我住嗰度有啲唔妥: 153幫輕
無記錯的話，我萌生賺錢念頭嗰陣大約係十歲。而靠阿婆養嘅日子，我地節衣縮食咁過咗五六年。
阿婆無要求過我翻工，但我想賺錢幫佢。於是我十六歲嗰年就開始炒散。
通常第一日翻，經理見我個樣比較細個都會問我幾大，我每次都答十八。有啲執得正嘅餐廳會要求我畀身分證，知我未夠秤就唔畀我做，但好多地方都唔會理咁多，所以我都叫有工翻。
「阿婆阿婆！我第一份人工呀！」嗰陣未有最低工資，但急住要人嘅炒散都叫有四十幾蚊一個鐘，翻星期六日由開舖做到收舖每日都有五百幾蚊。
「你係咪唔夠錢用呀？阿婆可以畀你喎，你唔駛出去翻工架。」
「唔係呀，係我想翻咋。啲錢畀你買餸架。」
「阿婆點可以要你啲辛苦錢架？」咁點解我同阿妹就可以用你啲辛苦錢？
「拎去啦，我想幫輕吓你，唔想你咁辛苦呀。」
「傻嘅，阿婆都唔辛苦。」佢塞翻嗰五百蚊入我袋：「自己用啦你，唔駛呀真係唔駛呀。」見佢極力反對，我最後都係放棄咗，但工就照翻，錢就全部自己儲住，以備日後不時之需。
阿婆一次都無要過我啲錢，而日後亦無要過Lucy啲錢。