[有沙入眼]是咁的，我覺得我住嗰度有啲唔妥: 115彌補遺憾嘅希望

吳非凡托一托眼鏡：「講假設講到似層層，我真係服咗你。不過呀，無辦法證明嘅假設永遠都只係假設，唔係事實。」

咁又係，妄想講得幾好聽，始終只係妄想。如果電子世界已經成為存放靈魂嘅平台，咁我今日都唔駛講依個假設出嚟。不過而家唔得，唔代表以後都唔得家嘛！以前又有咩人覺得人類可以去到天空？

科技總有一日可以將不可能變為可能，雖然喺我依一代未必可以見證幻想成真。可能喺我嘅世代，假設永遠只係假設，無法成真，無從證明。

「證實唔到嘅假設，如果令人有希望的話，唯一可以做嘅就係相信。」人類無辦法證明神嘅存在，但仍然會選擇去相信佢存在嘅假設，因為信仰令人有希望。

「阿金，依個假設令你有咩希望？」吳非凡望住我。



我眼皮半垂，避開佢嘅目光。

彌補遺憾嘅希望。