[有沙入眼]是咁的，我覺得我住嗰度有啲唔妥: 100記一世

「非凡，知唔知呀，人本來就係擅於遺忘嘅動物。」吳非凡唔擅於講野，所以更加多時候係我一個人高談闊論：「依個亦係恐怖體驗可以咁成功嘅原因。」

「點解？」

「你驚咩？」

吳非凡個樣有啲不解，諗咗諗，答：「我有密集恐懼症⋯⋯一粒粒密密麻麻嘅野都會驚。」

「好喇，你仲記唔記得自己上個月七號嘅午餐食過咩？」



正常人都唔會記得，除非有人用日記、相片同影片進行記錄。但依啲係外在輔助，如果無任何外在紀錄，單憑大腦嘅記憶，係唔會記得當日食過咩。

當然，世界上真係有人過目不忘，記憶力超群，但始終係少數，一般大眾嘅記憶都會喺時間流逝之下慢慢消亡。

吳非凡無疑只係普通人，所以佢擰頭：「唔記得喇。」

「你諗吓，如果上個月七號你食嘅野上面有蓮蓬，咁我再問你嗰日食過乜，你好快就會記翻起。」

人類對恐懼嘅記憶，會記一世。