[有沙入眼]是咁的，我覺得我住嗰度有啲唔妥: 99無聲沈落

佢講嘅夢同我之前矇矓嘅感覺不謀而合。

我曾經無伸出手挽留嘅人，應該就係Lucy。但我仍然無辦法肯定，因為我記唔起嗰個人嘅身影，所以我無同Lucy講依段記憶。

一份遺憾，連帶兩個人嘅心痛，喺年月嘅長河中被洗刷成夢，流入我地再無自覺嘅潛意識大海之中，無聲沈落。

兩個夢墮入海中，既無漣漪也無聲。

我地曾經講過唔會忘記，無論係開心到極抑或傷心到死嘅經歷，嗰時某人嘅樣同表情、聲音同氣味、講過嘅說話、一齊嘅回憶，終將有一日會連自己已經忘記都無辦法察覺得到。



無論幾重視嘅回憶，一旦無聲咁沈入海底，就會連曾經有過回憶嘅事實都忘記。

所謂忘記，就係我喺Lucy面前，但佢唔知道我係佢哥哥。

即使我以前對佢幾重要，一旦忘記，我就只會係個陌生人。

「我同嗰個男仔⋯⋯明明細個玩得咁開心，點解最後會變成咁呢？」

「繼續諗啦，好快會記得翻哂。」



原來，可以記得已經係一種幸福。

最悲傷嘅係連忘記咗都毫無自覺。

唔想忘記。

唔會忘記。

但如果忘記咗自己已經忘記，就連記翻起嘅機會都會永遠失去。



腦海浮現一節短短嘅記憶。