[有沙入眼]是咁的，我覺得我住嗰度有啲唔妥: 101恐怖體驗

細個畀狗咬過嘅人會一世怕狗，細個仆過落樓梯嘅人日後會小心行樓梯，細個有墮落重傷經驗嘅人會畏高。

對大腦構造嚟講，最諷刺嘅莫過於人類可以忘記開心嘅回憶，但往往好難忘記受重傷同恐懼嘅體驗。

正如愛情路上遇到仆街嘅時候，被傷害嘅一方總要用更多時間先可以遺忘傷痛。痛得愈深，愈難忘記。

我喺白板上面畫咗兩個圓圈，結構好似個「回」字咁。

「不過其實忘記，只係人類嘅記憶由表意識跌咗入潛意識。」我用箭嘴指向中間嘅細圓圈：「無論沈得幾深都好，令人有過情緒波動嘅回憶一定都仲會喺潛意識圈入面。」



一個箭嘴由細圓圈指翻上大圓圈，然後我喺旁邊畫咗隻鬼仔：「恐怖體驗喺玩家植入嘅潛意識之中，提取最重要嘅回憶，可能係開心嘅、傷心嘅，又或者係本人都忘記咗嘅願望，扭曲成恐怖經歷。」

「而透過恐懼，就可以令玩家記起同加深嗰一段最重要嘅回憶？」吳非凡問。

「無錯。恐怖體驗之所以咁多人玩，係因為依個遊戲幫玩家拎翻連自己都忘記咗嘅重要回憶。」

「我明喇。但係依樣野同我地要改良嘅植入技術有咩關係？」