[有沙入眼]是咁的，我覺得我住嗰度有啲唔妥: 52豬

打開大門嗰一刻，我當場呆一呆。

肉類腐爛同賣魚巿集嘅坑渠惡臭，暴力咁壓入鼻腔。

只見鐵閘外面有個著住染紅圍裙，踢人字拖嘅大肥佬，拖住一個寂靜嘅垃圾袋。半透明嘅表面展現袋中嘅人類斷手斷腳，猶如被小朋友夾硬扯到四分五裂嘅血色洋娃娃。

我沿住血水流落嚟嘅軌跡望上去，見到一把厚重嘅豬肉刀，相比之下我把菜刀好似得翻萬用刀咁大。

肥佬屠夫個頭扭向我，凶光閃閃嘅豬頭竟然散發老虎獅子發現獵物嘅氣息。



豬，微微一笑。