[有沙入眼]是咁的，我覺得我住嗰度有啲唔妥: 51開門，走人！

點點星塵喺室內好似番梘泡咁，一粒一粒破裂、消失。眼前鑿滿一個個血窿嘅牆壁、電視、枱凳床，全部好似鏡碎片咁散落一地。

當我回神過嚟嘅時候，我已經企翻喺自己屋入面。就好似我一開始入屋嘅情景咁，彷彿啱啱發生嘅一切都無存在過。

同時，我嘅眼角已經捕捉到蠢蠢欲動嘅衣櫃。

「啞咔咔。」老舊嘅衣櫃門發出反抗嘅聲音，黑暗嘅門罅之中，顯現出瘋狂嘅血色眼珠。

叫我直面恐懼⋯⋯我以前到底有乜記憶可以比系統扭曲到咁恐怖呀？大腦清楚浮現「淨化」兩個字，我嘅理性好清楚話畀我知要做乜，但係加速狂跳嘅心臟就同我講：「快啲走。」



「嘻嘻。」

「嚟搵我丫⋯⋯」我又開始聽到衣櫃傳出嘅輕聲細語，聲線幽怨扭曲，唔洗諗都知入面有隻怨靈。

上一次我選擇咗逃走⋯⋯

今次我都係選擇逃走！唔好同我講笑喇，我屋入面依隻野同吳非凡屋入面啲眼又點可以相提並論？

我衝入廚房拎菜刀準備隨時自我防衛，然後趁衣櫃怪物仲未向我攻擊就跑去大門。



開門，走人！