[有沙入眼]是咁的，我覺得我住嗰度有啲唔妥: 39眼珠

「我啱啱咪話，啲恐怖體驗片段會儲存喺主機嘅？個遊戲重點唔係玩同通關，而係有人想睇我地點樣面對恐懼同死亡。我地就好似一部恐怖電影嘅生產機咁，日日畀唔同嘅怨靈怪物整死，而外面嘅人就日日有得睇新戲。」

即係話，有人想睇我地面對恐懼同死亡嘅片段？咩人咁變態？

「咁係邊個將我地嘅意識植入嚟？」

肥佬搖搖頭：「唔知，可能係個好憎我地嘅人卦？」

我諗都係，起碼我知自己實唔會變態到想睇自己點死。



「我地嘅肉身而家又喺邊度？」

肥佬無奈咁搖搖頭：「唔知，因為只係抽取咗少部分潛意識植入，我地嘅身體仍然有大部分潛意識同表意識，唔會影響生活。所以我地嘅身體而家可能係翻緊工，或者嘆緊下午茶都唔出奇。」

據講人類嘅意識就好似冰山咁，表意識只佔百分之十，其餘百分之九十都係藏喺海入面嘅潛意識。我地可能係當中嘅5％或者10％，自然唔會影響肉身嘅生活。

「照你咁講，原本嘅我地就算已經死咗都唔出奇？」

「我地唯有祈求唔係咁樣。」肥佬停一停，又講：「如果無辦法登出，翻去自己個肉身，就唔會知我地仲在生定已經死咗。」



無錯，討論原本個身體點樣根本無意義，因為根本無從證明。依個時候，我就留意到一個問題。

「喂，你話啲片會存喺主機記憶體入面，咁如果記憶體容量唔夠、就爆、爆咗咁點？」

「你電腦記憶體就爆會點丫？分別在於你手動產野，但依度嘅主機會自動delete野囉。當記憶體飽和，主機就會放哂所有死魂出嚟，清除記憶體入面所有意識。」

咁個世界就會重新嚟過。

佢啱啱講完，我就見到牆上一個個圓窿入面，有隻眼珠擘大咗，望住肥佬。