[有沙入眼]是咁的，我覺得我住嗰度有啲唔妥: 40透明牆

「咦？你去咗邊？」同一時間，肥佬嘅眼入面失去咗焦點，我就好似喺佢嘅視界消失咗咁。

「發生咩事？人呢？」

「我喺你面前呀！喂！肥佬！」我衝上前，但我竟然撞到透明嘅牆。好明顯，幅透明嘅牆就係阻隔我同肥佬嘅原凶。

「喂！幫我！我叫曲金鉉呀！」我諗起共鳴嘅關鍵字，又重新講一次，但肥佬仲係左望右望，不停問我去咗邊。

牆上無數嘅眼珠不停眨眨吓，肥佬終於注意到，於是拎起錐同鎚跑向身後嘅牆：「又係你地！放我出去！」



尖錐對準圓窿入面嘅眼球，手起鎚落，一陣肉丸被貫穿嘅微響。

我發現，面前嘅透明巨牆隨住肥佬鑿穿一粒又一粒眼珠而向前移動。

「唔好呀！咪再鑿啲眼呀！」由第一粒眼珠開始，透明牆就向肥佬靠近，每鑿穿一粒，牆就加快速度壓埋去。

「唔好望！唔好咁望住我呀！你地根本就唔一樣！根本就唔一樣！」肥佬發哂狂，將牆上嘅眼珠一粒粒鑿成碎爛，啡色黏液連帶好似爛啫喱嘅晶體係牆上慢慢滑落。

「嗄⋯⋯嗄⋯⋯」肥佬鑿到成身汗，用沾上怪異液體嘅手托一托眼鏡，滿意咁望住牆上每一個滲血嘅圓窿。



我不停拍打透明牆，但係完全無辦法令肥佬注意到我嘅存在。

牆上滲出血水嘅圓窿入面，佈滿血絲嘅眼球再次擘開。

「啊啊呀呀呀呀！！！」