[有沙入眼]是咁的，我覺得我住嗰度有啲唔妥: 38淨化與共鳴

肥佬話恢復記憶嘅方法有兩種，一種叫「淨化」，另一種叫「共鳴」。我啱啱就成功同佢共鳴，所以令佢有翻一部分記憶。

本來恐怖體驗遊戲嘅設計係好似平行世界咁。每個意識之間有一個獨立世界，互相無得通訊，但如果意識之間有共通嘅回憶，平行世界就有機會相交，令兩個意識見面，並記起一啲資訊同記憶，幫助「淨化」。

好明顯，我講嘅「幫手」同我個名，就係共鳴嘅關鍵字。可惜嘅係肥佬記翻一啲野，但我仲係咩都記唔起。我同個四眼肥佬會有咩共同回憶？唔會係玩菊花卦？

而「淨化」，除咗係拎翻記憶嘅方法之外，亦係通關嘅方法。具體點做唔知，但簡單講就係淨化之前發生過嘅恐怖體驗。

「主機將你嘅記憶扭曲成一種恐怖經驗，所以淨化咗之後，原本扭曲嘅記憶會回復原狀，你就會記翻起。」肥佬停一停，又講：「跟住就係我嘅猜測喇，我諗淨化哂所有恐怖體驗之後，就係爆機，可能就有得登出。」



「所以我地而家首要做嘅野，就係淨化啦係嗎？」

肥佬點點頭。

「問多個問題，點解要植入意識？」

「因為恐怖體驗依個遊戲，最主要嘅目的唔係親身玩，而係睇。」

睇？