[有沙入眼]是咁的，我覺得我住嗰度有啲唔妥: 37植入式

「起碼我記得嘅訊息入面無相關嘅資料。但係我已經知多咗好多野。」

「你知幾多都無用啦，走唔甩有鬼用咩！」

「有通關方法，話唔定通關之後就走得甩。」

「咪住！點解咁麻煩？我地除咗個VR眼罩咪得囉！」我用手不停喺眼前亂摸一通，但都無摸到VR眼罩。

「你係咪有病？依隻game係『植入式』嚟。」肥佬問我。



「咩叫『植入式』？」

「即係將意識植入喺處擬世界入面囉。我地淨係得意識喺度，控制唔到身體架。仲有，而家玩VR唔駛用眼罩架喇，VR眼罩已經係好耐之前嘅古董。」

「咪住先，而家係幾年幾月幾日？」

「我講嘅日子同你嘅日子一定唔相同，因為植入咗嘅意識對時間嘅認知會停留喺嗰個年代。我嘅年份係2040年。」

未來人！



我雖然唔記得自己幾時搬嚟，但大致上嘅年份應該係2020年左右。

「意識植入咗之後，就無再跟隨肉體去感受現實世界嘅時間流動，所以對時間嘅認知就會停留。」

肥佬托一托眼鏡，再講：「正常嚟講，睇你個樣廿幾歲，植入技術面世嘅時候你應該會記得。不過你唔記得都合理，因為依個遊戲嘅設計本來就會令人產生記憶障礙。」佢指一指自己：「好似我咁，依啲資訊我頭先都係完全唔記得。」

「咁點解你而家會記翻起？」

「依樣就真係要多謝你喇。」