[有沙入眼]是咁的，我覺得我住嗰度有啲唔妥: 29既視感

唔知點解我覺得眼前嘅景象似曾相識咁，潛意識話我知，再唔即刻離開間屋就實死無生。

眼見幾十隻好似饑餓魚群咁向我襲擊嘅怪手，我竟然好冷靜。或者因為我模糊嘅記憶所形成嘅既視感，令我有種早有準備嘅安全感。

左、右、上。

我憑住模糊嘅感覺左閃右避再跳起，估唔到啲怪手真係衝向右邊撲去左邊同攻我雙腳，而我勉強都避得過。

我一邊避一邊後退，由於我屋企真係幾細，避咗兩次襲擊之後已經去到大門口。



依個時候，見幾次攻擊都無效嘅怪手停止咗雜亂無章嘅襲擊，好似留意緊我嘅動向咁。

我知道，佢係等緊我以為得救，精神鬆懈嗰一刻先再向我攻擊。因為人最無防備嘅時候就正正係以為自己脫離危險嘅一瞬間。

空氣好似凝結咗咁，無形嘅張力喺我同怪手之間拉扯，令人心跳加速。

屋入面只有我嘅呼吸聲，感覺到額頭嘅毛孔擠出冷汗。

我面向衣櫃，右手繞到身後摸索大門門柄。



扭開門鎖。

咔嚓。