[有沙入眼]是咁的，我覺得我住嗰度有啲唔妥: 30蛇

就喺我轉身開門嗰剎那，身後嘅怪手就對準我背脊衝過嚟。

打開屋企大門，我而家真係感動到想喊！真係好慶幸自己啱啱無閂到鐵閘！

我全神貫注喺逃走之上，頭也不回，因為我知回頭嗰半秒就可能畀怪手捉到。

我幾乎係跳出屋企門口，差唔多全身都已經出咗走廊，但我隻腳未出哂，竟然畀怪手捉住咗！

「屌！！！救命！！！救命呀！！！」一大堆手入面得一隻夠長伸到出屋外，其他手雖然出盡力想捉我，但係始終捉我唔到。



不過問題係捉住我嗰隻手好很大力，明明瘦骨如柴咁，但我隻腳點掙扎都甩唔開佢。

我狂用力踢佢，又用手揼佢，但隻白手淨係愈捉愈大力。指甲插入我腳腕，血水滲出。

我發現隻腳嘅顏色開始變灰，睇嚟係因為隻手揸得太大力而無血到，如果我一直走唔甩，咁隻腳就會壞死。

令我更絕望嘅係，我嘅身體正逐少逐少畀怪手拉翻入屋，其他比較短嘅手就好似等待老鼠嘅蛇咁對住我，隨時突襲。