[有沙入眼]是咁的，我覺得我住嗰度有啲唔妥: 16接近者

濃烈嘅腥臭令我想反胃，臭味嘅源頭終於得到確認。

唔會有錯，啲味同喺走廊徘徊不散嘅味道係一模一樣。鞋印由我屋企隔離單位開始，咁即係話我隔離間屋其實就係源頭。

我一手揞住個鼻，另一隻手就伸去篤下個袋⋯⋯有彈性嘅條狀物體。

嗰種觸感有啲似包住鐵通嘅海綿蛋糕。

奇特嘅手感引誘我嘅神智，於是我忍住氣用埋另一隻手拉開個垃圾袋。



瞳孔收縮，排斥眼前嘅光景。灼熱嘅酸味由胃袋衝上口腔，我就咁嘔咗啲胃酸出嚟。

火燒喉嚨嘅不適隨住時間過去而減弱，但烙印喺腦海嘅震撼映象恐怕今生今世都無辦法抹消。

垃圾袋入面，係一堆沾染血花嘅人類手臂。

「沙喇沙喇。」

無人嘅寂靜令垃圾袋拖行嘅聲音異常咁清晰。



「啪。啪。啪。」人字拖鞋底同石地面撞擊而響起令人窒息嘅節拍。

丟依袋斷手垃圾嘅人，一步一步行緊過嚟。