[有沙入眼]是咁的，我覺得我住嗰度有啲唔妥: 15垃圾

紫黑色嘅鞋印由隔離單位門口一直伸延到走廊盡頭，顏色愈遠愈淺。我眼前好似重現咗某個人喺屋企行出嚟嘅景象。

今朝都見唔到塊地咁樣架？

我踎低，仔細觀察鞋印，就發現好大可能係乾涸咗嘅血。

咩人會踩住一對染血嘅鞋喺屋企走出嚟？

雖然依一刻證明我隔離有人住，但我預感話我知，佢唔係正常人。



我沿住啲腳印行出走廊，就到一塊空地。右前方通向另一排單位，左方就係樓梯。

鞋印去到樓梯口就無咗。

十二級樓梯下方，有個黑色垃圾袋畀人隨手丟棄，魚腥味令我眉頭深鎖。

我左右望下有無其他人，確認得自己一個之後就行落去。

住例得村嘅人都習慣將垃圾丟出門外等人收，唔會特登拎袋垃圾去後樓梯。



樓層之間嘅長方形平台一角，巨大嘅黑垃圾袋靜靜咁散發不詳氣息。