[有沙入眼]是咁的，我覺得我住嗰度有啲唔妥: 14臭味

是咁的，我覺得我住嗰度有啲唔妥。唔講啲咩鬼故怪談嚇大家，我係單純因為好現實嘅問題覺得自己嘅住處唔多正常。

困擾我嘅野好簡單，就係惡臭。

我住走廊最尾嘅單位，每日翻去都要行哂成條走廊先到自己屋企，由於太臭，我會忍氣行。但有時頂唔順要換氣，就會被逼吸一啖臭氣。

嗰股籠罩走廊嘅氣味，令人覺得吸一啖入去，內臟就會腐爛，真係臭得好交關。

我試過打電話去投訴，可惜好似成日撞正管理處個看更巡樓，無人聽電話。



我又諗過同啲鄰居講吓依個咁嚴重嘅惡臭問題，不過我住咁耐都未撞過住同層嘅人。而照臭味問題一直無解決依一點嚟推測，我諗同層嘅人應該都無投訴過。如果唔係一定有人處理。

點解同層嘅人會唔覺得有問題？我有幾個假設。

一，佢地投訴咗都無人做野。

二，佢地投訴又咁啱無人聽。

三，佢地聞唔到臭味。