[有沙入眼]是咁的，我覺得我住嗰度有啲唔妥: 13撕

然後再下一張相，我已經得翻一個斷頭，靜靜直立喺床上面。七孔流出嘅血水同頸部源源不絕噴出嚟嘅血將床單染成朱紅色。

我慘叫一聲，下意識去摸下自己條頸，好彩未斷。

已經瀕臨崩潰嘅我已經唔想再留喺屋入面，我跨腳落床，床下嘅櫃筒同時打開，慘白嘅手掌竄出，五指一抓一扯，我大脾下面一大塊肉就間生被佢撕咗落嚟。

「啊啊啊啊啊啊啊啊！！！」劇痛令我失去理智，拎刀向櫃筒亂插，但係入面已經唔見白手同我大脾塊肉。

只淨低一堆比血沾濕嘅衫褲。



大脾後側受傷嘅我㩒住出血嘅傷口，拖住右腳行去大門。失去血肉嘅痛由下身向上身擴散，刺激冷汗分泌。

溫熱嘅血喺我大脾分裂為腥紅閃電，然後喺地吓拖出一道赤軌。

「好痛⋯⋯」我已經驚到淚水鼻涕都標哂出嚟，但係我知如果我唔咬實牙關走出間屋，咁我個頭好快就會成為床上嘅詭異飾品。

扭開門鎖。

咔嚓。
衣櫃大門應聲打開，我轉頭一睇，見到幾十隻蒼白嘅手逼埋一舊，紛紛向我嘅位置伸過嚟。



好似真理之門湧出嚟嘅手，一隻又一隻，急速向我飛過嚟。

我打開屋企大門，絕望咁見到門外嘅鐵閘。

如果我無閂鐵閘，快幾秒，就會走得甩。

我嘅手發狂咁伸向鐵閘鎖，而背脊同時散出劇痛。我就好似舊版鋼之煉金術師入面嘅愛德華咁，比門伸出嘅手間生扯走啲肉。

我一路嗌唔好同叫救命，遺憾係入夜嘅例得村，任你點樣大聲求救，都唔會有人嚟救你。



我趴喺鐵閘上面，左手垂死掙扎咁揸實鐵閘個鎖。

我全身嘅肌肉組織，就喺我嘅慘叫之下，一絲絲咁比衣櫃嘅白手撕哂出嚟。