[有沙入眼]是咁的，我覺得我住嗰度有啲唔妥: 6逃走

「砰！」屋入面嘅人聲隨住大門自動閂埋而消失。我用力扭個門柄，扭到「咔咔」作響。

我開唔到門，翻唔到入屋。

成個世界，一粒聲都無。

無論係報案中心把女人聲，定我嘅心急呻吟，都比昏暗無光嘅走廊吸收入，遁入虛無。

我扭咗個門鎖幾吓，發現已經比人反鎖咗之後，無奈咁放棄反抗。



下一瞬間，我覺得自己嘅本能好清晰咁同自己講咗一句嘢。

走，快啲走。

我終於記起，入屋之前，走廊盡頭嗰舊肉色嘅異物。

我驅動好似凍僵咗嘅頭部，冷汗滑過太陽穴。視線轉向走廊盡頭。

「啊啊啊啊啊！！！！！」



潛意識控制咗我嘅身體，除咗跑、走，我個腦完全無任何雜念。真心，可能快過保特。如果跑得慢就會死，相信好多人都可以逼晒自己啲潛能出嚟。

啱啱我轉頭嗰剎那，隻怪物已經由走廊盡頭逼近到我屋企前兩個單位，我嚇到即刻調頭走。

我唔敢擰轉頭，因為怕佢已經喺我後面。我個腦話比我知轉身就實死無生，千祈唔好望後面！

我一路跑，一跑搖自己個頭，發出似笑非笑，喺極限狀態下嘅叫聲。

突然間，我發現自己就好似傳聞中嘅女鬼。



唔通嗰個係人？同我一樣避緊隻怪物？