[有沙入眼]是咁的，我覺得我住嗰度有啲唔妥: 7乒乓波

一陣絕望嘅感覺襲擊胸口，因為我知道喺依度嘅夜晚，無論你點樣慘叫，都唔會有人出嚟救你。

我繼續跑，穿過樓梯前嘅空地，再走入另一條走廊。

「有無人呀？救命呀！」我懷住一絲希望慘叫，希望有人聽到會打開門睇下，但直到我又跑完一條走廊為止，都無一户開過門。

而當我走到出去，我就記得一啲野。

係喇！咁就有救，點解我咁都唔記得呢？



「噠噠噠。」

當我跑過第二條走廊之後，眼前就係一個小空地，中間有張石製乒乓波枱，兩個小朋友喺度對打緊。

「噠噠噠。」異物撞擊石枱嘅聲音，伴隨一男一女小朋友歡樂嘅笑聲清晰咁迴盪。

我見到得救嘅希望，一時太興奮失咗平衡，仆咗落地。

「小朋友！救命呀！」



「噠、噠、的噠⋯⋯」背對我嘅男仔畀我分散咗注意力，失咗一球，個白色乒乓波跌咗落地，向我碌過嚟。

同一時間，我個腦開始正常少少咁運作。

我屋企同依邊有兩條走廊嘅距離，點解一開始我會聽到佢地嘅打波聲同笑聲？

「哥哥，可唔可以幫我地執返個波呀？」

我望住好似畀磁石吸引住而向我碌過嚟嘅乒乓波，隻手不受控制咁拎起咗佢。



黏滑嘅表面，同好似墨魚丸咁嘅微微彈性。

我用力呑咗啖口水，驅動抖震嘅手指，擰一擰粒波。

瞳孔對住我，原來唔係乒乓波，係粒眼珠。

「哥哥，一齊玩吖。」

我已經麻木晒，因為我知自己死梗。

抬頭望上去，眼眶之中呈現兩個血窿嘅男仔對住我，好開心咁笑，嘴角扯到上耳珠。

「終於搵到新朋友喇。」

最後，只有我嘅尖叫聲，撕裂例得村嘅夜空。