[有沙入眼]是咁的，我覺得我住嗰度有啲唔妥: 5恐怖原則
我部iphone6自動開咗擴音器：「你好999報案中心。」
我發晒狂咁用手指壓落個紅色收線制度都無反應。如果淨係部手機係咁，我仲可以話比人hack，但連埋花灑噴血又可以點解釋？
「你好999報案中心。」嗰把親切嘅女聲仍然好似錄音咁喺我間屋迴盪。
我終於都忍唔住，iphone無得拆電，咁唯有一野掟出街。
我行出露台掟咗部電話落街，與此同時，我望向廁所，掛入馬桶嘅花灑已經無再噴血，連「沙沙沙」嘅灑水聲都無埋。
我間屋，終於回復平靜。
我用力搖下頭，又捏下自己塊面，真係痛架喎，我唔係發緊夢。
其實無啦啦遇到難以解釋嘅恐怖體驗，係人第一個反應都會以為自己發惡夢。
咁唔係惡夢，要點樣解釋依一切靈異現象？
如果依個係故事，唔駛問都知一定爛尾，因為無合理嘅解釋。
但對人類嚟講，解釋唔到嘅神秘感先至最令人心寒。
我曾經喺書入面睇過，令人覺得恐怖嘅因素有三個：
一，恐怖之物唔會死。
二，恐怖之物唔可以擁有溝通能力。
三，恐怖之物一定要係直到最後都唔知係乜嚟嘅野。