男校生活史･回到起點: 第七章 回憶2

其實我知道佢對每一個同學都咁好。

我係小學可以話朋友都唔多個, 唔出名。因為入到尼呢一間中學, King Sir中一學期尾果陣推薦我入多元學會(Activities club), 我覺得好多事都改寫左我既過去。

原本唔多講野, 好怕羞既我, 經過左幾年努力, 就爬出左自己多年來窄小的框框。

過去？每個人都總有唔想人知既過去。你有、同學們有、你父母有、我都有。

「+852 xxxxxxxx已將你加入群組」

「+852 xxxxxxxx將主題由"1011ATC幹事"改為"1112ATC幹事"」

「Hello各位大家好呀，我地今年又多左兩位新幹事，係Johnny同俊敏! 歡迎歡迎, 歡迎成為新一任幹事, 不如各位自我介紹呀!」

群組入面有成二十幾個電話號碼, 我根本就唔知喺邊個打邊個......

「喂Hello呀! 我係肥Joe, 歡迎(掌聲) (掌聲) (掌聲)。我上面嗰條友係諾Sir。」

「你又搶我對白...... 」

「你哋好! 我係俊敏! 多多指教!」呢個時候我出聲, 換返嚟嘅竟然係冇人應我, 原來我自小就比人Dead Air㗎啦......

「記得聽日第一次會議呀!」

中一嘅我都唔擔保有啲咩學識。就喺第二朝星期六嘅朝早, 我約咗Johnny一齊返學開會。我先話Johnny同我係死黨, 係因為我哋中一除咗係同一班同學之外, 仲參加埋同一個學會, 做埋幹事㖭!

不過等我話你知, 維持一份友誼5年, 真係唔簡單唔簡單唔簡單。

行到入會議室, 我只係攞咗一包嘢飲跟住就坐低咗。

「都話有人會遲過我地㗎啦!」平時一向都唔遲到嘅我只係憤怒咁啤住佢。

講起遲到, 而家我真係次次都遲十分鐘先安樂, 究竟如何回到中一中二時咁可愛, 咁守規矩嘅我呢......

攞住嗰包飲完嘅盒裝嘢飲, 一心想玩Johnny, 我就一隻手楂落盒檸檬茶, 一下...... 兩下...... 三下!

見到johnny避得咁開心, 我突然好想揸多幾下, 但誰不知......我high得濟, 就連身邊有個師兄叫我停, 我都聽唔到。

直到個師兄想一巴車落我度嗰陣......

「喂! 我頂嘟嘟嘟, 叫你唔好再整落我度呀聽唔聽到呀, 你啲檸檬茶呀, 啲汁飛曬落我度啦! 有冇病呀你! 」

呢個時候其他師兄都好落力咁阻止住佢......

「Sorry......」我阿爸阿媽都未打過我, 呢一刻, 我真係好驚, 因為有個師兄想打我。

不過我最好奇嘅係, 當時嘅一刻, 竟然全部師兄都係幫住佢, 究竟點解呢? 呢一刻我真係唔理解。

「佢今日有啲燥底呀!你唔使理佢㗎, 你原諒佢啦。」有一個師兄同我講。

但我好奇嘅係當時嘅一刻竟然全部師兄都係幫住佢。

但我更好奇嘅係, 佢當時係我師兄, 但回到中五既我, 依家佢變成咗我死黨......

所以話人類係幾咁奇妙。

<故事待續......>
------------------------------------------------------------------------------------
Sorry ah各位遲左，請見諒!
如果大家覺得好睇就留個言啦! 支持一下小弟~​





1/1/2017: 第八章