[真人真事][校園][純愛]緣定·十年前: 第二十九章
之後我地冇任何特別野,
不過其中一次出街就好令我印象深刻

話說有一次我地去圖書館溫書,
點解無啦啦會去溫書?
就係因為我地學校放完復活節假先考試

變左復活節假有好多日都用左嚟溫書

原本以我性格都唔會溫書嘅,
冇計啦,
呀雪話仲有唔夠一年就會考,
開始要努力下,
咁我咪溫下囉,
當陪下佢都好啦
咁我地住嗰區有圖書館嘅,
理所當然去呢個圖書館啦

無謂行咁遠,
又慳時間同車錢,
咁有一日我地照例去呢個圖書館溫書啦,
上晝就去左溫,
溫到一兩點話肚餓

就決定落去食啲野先再溫,
咁我同呀雪就一齊行去搵餐廳啦,
行行下見到一個女人,
呀雪即刻停左

我問佢咩事?
佢即刻話:「媽咪,你又喺度嘅

雪媽:「係呀,啱啱教完琴咪去食野囉,
呢位係

我:「姨姨哈佬,我係丁仔呀,同呀雪係同班同學

雪媽:「你地食左野未呀?不如一齊啦.」
我同呀雪都冇乜反應,
因為發生左啲咁意外嘅野

呀雪細細聲問:「你想唔想呀?」
我:「你話事啦,我冇問題.」
呀雪:「哦,咁好啦

就係咁我第一次見左家長喇

呀雪:「放心啦丁仔,
媽咪唔似tbb嗰啲惡死奶奶,
我諗冇事嘅

我話唔緊張就呃你嘅,
希望真係好似呀雪咁講冇事啦

去到餐廳就叫野食啦,
叫完之後等啲野送嚟嗰陣,
雪媽:「你地拍緊拖呢

我同呀雪:「係呀

雪媽:「放心啦,auntie唔係嗰類中學生不應談戀愛嘅人

我都做過學生嘅,
況且你地拍拖暫時睇嚟冇乜負面影響丫,
之前睇呀雪份成績表,
數學好左好多喎,
丁仔你教佢呢

我:「少少咁啦

雪媽:「初初我都擔心呀雪嚟新學校會唔慣同唔開心,
點知兩樣都冇,
反而仲開心過之前,
依家知點解喇

呀雪面紅紅咁講:「媽咪丫......」
雪媽:「你真係由細個到大個都係咁,
一緊張就面紅.」
原來佢以前已經係咁

之後我地傾左好多野,
話呀雪細細個已經好靚女,
身邊都有好多狂風浪蝶,
咁睇嚟我都幾好彩

我喺度講下呀雪媽媽先,
外表睇落好後生,
同呀雪一樣都係好白

正職係負責教鋼琴,
而呀雪都識彈鋼琴,
不過興趣就唔大,
所以就冇鑽研落去,
呀雪同佢媽媽感情幾好

似朋友嗰種母女關係,
食完就同呀雪媽媽分別,
我同呀雪繼續返去溫書,
張單就呀雪媽媽埋左

我:「你媽媽幾好人,
又冇嗰啲傳統思想

呀雪:「話左冇事架啦

我:「至醒係你喇

呀雪:「當然

呀雪媽媽真係一個好好嘅人

唔係特登擦呀雪鞋,
事實上呀雪媽媽係一個好關鍵嘅人物,
對於日後而言

我就暫時賣下關子先.