[真人真事][校園][純愛]緣定·十年前: 第三十章

跟住都係啲無聊野,
我就唔講咁多喇
冇乜特別,
咁講下復活節假之後嗰個考試啦,
呢次考試小弟出奇地考到頭十
應該係第一次唔靠出貓都有咁嘅成績
第一個要多謝嘅當然係呀雪啦
唔係佢,
平時放學,復活節假都唔會去圖書館溫書,
功勞歸於佢




至於呀雪考左個全班第一返嚟,
咁又係嘅
本身佢就係band1料,
喺普通班入面考第一係好正常嘅事,
呀雪媽媽見到佢個女考得咁好,
應該唔會咋佢形
唔俾佢拍拖呱,
另外,
由於班上其他同學仲未知我同呀雪拍拖(得呀余,呀婷知),
所以有好多狗公走過嚟撩呀雪,




「嘩呀雪你好犀利喎.」
「呀雪你英文好勁呀.」
「呀雪你平時可唔可以教下我呀.」
假到呢
試下考第一嗰個係我,
你估佢地仲會唔會咁講
「收皮啦,出貓狗 」
「俾左幾多錢呀sir呀 」
「以為自己好乸勁 」
我肯定到時班狗公實咁講,




好彩,
呀雪都識點做
對住班狗公都係一句起兩句止,
令佢地自己無癮離場,
呢個女朋友,幾好幾好

考完哩個試,
派埋成績,
代表中四就快完,
即將升上中五
距離會考又近一步,
回顧返呢一年,
估唔到自己會開到齋拍拖,
開學前真係諗都冇諗過
當時天真嘅我,




梗係希望可以同呀雪一齊克服會考,高考啦,
十年後諗返自己原來當時個思想係咁單純,
換轉係依家渡過左十年光陰嘅我就唔敢去諗呢啲野喇,
人大左,
連膽量都俾歲月攞走埋
講返正題,
咁喺中四last day嗰日,
散學禮完左之後,
我同呀雪偷偷地留喺學校唔走住
諗住喺學校影下相先走,
當日佢戴左部相機返嚟,
我地去左圖書館,班房,操場影相,
呢幾個地方喺呢一年都帶左唔少回憶俾我地
值得去影相留念,
影完相之後就走喇,




要隔幾個月,
到九月一日先再返嚟.
之後我地就開始放暑假,
暑假嚟嚟去去都係做幾樣野,
就係陪呀雪出街,
唔使出街就喺屋企打丁,打機
連波都少踢左,
正當我生活過得好安逸之際,
突然間收到一個好震驚嘅消息

有一日我喺屋企上上下網,
無啦啦呀雪打比我,
呀雪:「丁仔依家出嚟講幾句好冇?」
我:「好,但係咩事咁急 」
呀雪:「出到嚟先講啦.」




我:「好,邊度等?」
呀雪:「去除夕坐嗰個公園等.」
我:「好.」
我心諗咩事要出得咁急
唔通呀雪出左大鑊野?
之後我去到公園見到呀雪頭耷耷坐左喺度,
我:「靚靚女朋友,咩事咁愁呀 」
呀雪:「丁仔,我依家講啲野俾你知,
你要有心理準備 」
我:「好,你慢慢講啦.」
呀雪:「頭先我同媽咪去覆疹.」
我聽到呢度已經知瀨野
平時呀雪覆疹都係同佢媽咪去,
佢唔想我擔心所以不嬲都唔叫我去,
呀雪:「醫生話我個病情開始惡化,




佢建議要去外國醫.」
希望各位巴絲體諒我喺呢方面唔講太多
我:「下,你唔係話你情況有改善咩?」
呀雪:「係呀,
但近期又開始轉差 」
我覺得自己好水皮,
連自己女朋友病情轉差都唔知,
我:「sorry呀我留意唔到你病情轉差 」
呀雪:「唔關你事,
本身就好難察覺,
連我自己都唔知自己病情轉差 」
我:「咁你依家諗住點呀?」
呀雪:「等爸爸今晚返嚟先決定,
不過多數去外國醫,
趕喺九月頭返嚟學校 」
我:「放心啦,
等我過啲旺氣俾你就得 」
呀雪:「你好似一向冇乜運仔.」
我:「錯喇,
我一生最大運氣就係識到你
一鋪用晒啲運.」
呀雪:「嘻嘻傻仔 」
我:「笑返咪好囉
頭先見你唔識笑呆下呆下以為你唔知有咩事.」
呀雪:「好喇夜囉,
我都要返屋企.」
我:「送你?」
呀雪:「你可以唔送嘅 」
之後我一手捉左佢隻手講:「行啦 」

送左佢返屋企,
我都除返啱啱為左呀雪唔好咁擔心而戴嘅開心面具,
女朋友出左咁嘅問題,
自己又點會唔憂心呢
不過我表露埋的話,
只會令佢煩上加煩
無謂丫,
但我真係好亂,
唉,
搵呀余傾下先.