[真人真事][校園][純愛]緣定·十年前: 第二十五章

返到屋企慣例打個丁先
打完丁就搵呀余打機
新年假期功課?
梗係最後一日先做
打機中途我地傾緊少男心事,
我問佢:「今日有冇見到呀雪派朱古力俾其他人 」
呀余:「你成日喺佢隔離架,你有冇見到丫?」
我:「冇呀.」
呀余:「我都冇,不過做乜無啦啦咁問嘅 」
我:「之前我問佢有冇鍾意嘅人,佢緊張到口窒窒兼細細聲,




即係九成九有啦
所以我諗住喺佢派朱古力俾嗰啲人度揀
點知見唔到.」
呀余:「死仔發展得咁快嘅,不過點解咁突然問佢有冇鍾意嘅人 」
我:「佢問我先架,加上我又八掛呢 」
呀余:「咁你兩個今日一齊走,
佢有冇俾朱古力你先 」
我:「有呀,
我有問佢點解上堂唔派
佢話整得好少,驚俾得呢個就俾唔到另一個,




點知整左成袋 」
呀余:「丁哥你幾時咁鈍架 」
我:「做乜勁 」
呀余:「人地做到咁出面都唔知 」
我:「唔係掛.」
事實上當時我真心唔覺
加上毒男永遠覺得自己同人比係差一線
又好難怪我當時咁諗,
呀余:「淨係俾朱古力你而唔俾其他人就知咩事啦
加上你頭先講佢問你有冇鍾意嘅人,




之後你問返佢又緊張,
掉返轉講,
呀雪嗰陣問你有冇淆底丫 」
我:「梗係有啦 」
呀余:「咪就係囉,
俾自己鍾意嘅人問有冇鍾意嘅人實會緊張架 」
我:「但係我條件麻麻咋喎
佢會唔會睇得上眼呀?」
呀余:「中學生拍拖邊度會講咁多條件架
講真,
佢喺學校最熟嘅男仔就係你,
我都未見過佢同男仔講野咁滯
今次你執到靚籌喇 」
我:「你講到似層層咁,
咁大佬我應該要點做 」




呀余:「老老實實,你鍾意唔鍾意佢先 」
我:「鍾意呀.」
呀余:「咁去馬啦 」
我:「但係我唔知去馬要講咩喎?」
呀余:「我肯定你勁嗡一輪佢都受你 」
我:「係咪真架,我信你架喇大佬.」
呀余:「係呀.」
雖然呀余講到好大機會咁,
但我都仲係有啲保留
最怕表白完衰左冇fd做
呢下先弊,
到時返到學又尷尬
不過算啦,
好,死就死啦.





之後就新年啦,
我年初一至年初三要返鄉下
Hihi三日冇得打丁
年初四先返到香港,
返到香港第一件事梗係打丁先
正
抖左一日,
年初五就喺msn約呀雪聽日出嚟,
重點內容當然係表白啦
我:「聽日去xx商場行下好冇,
吉之島好似做緊大平賣 」
xx商場就係上次除夕行嗰個商場,
打完之後好乸淆,
隻手狂喺度震
驚佢唔覆機,




又驚佢唔出嚟,
平時約佢都唔係咁,
可想而知我有幾毒
之後佢終於覆,
呀雪:「好呀,睇下有幾平都好,
幾點等 」
我:「順便出嚟食晏?」
呀雪:「好 」
當佢話好,
我就埋頭度緊我個大計,
叫我勁嗡就叻姐,
依家叫我表白喎
之前又冇經驗,
點講好呢,
唔通好似啲低B劇集咁




「我好鍾意你呀,做我女朋友好冇?」
「好呀.」
之後大家攬埋一舊打車輪,
諗下都知硬膠啦
唉呀,究竟點好呢