[真人真事][校園][純愛]緣定·十年前: 第二十六章

第二日,亦即係年初六,
唔知係咪朝早個腦醒啲,
竟然俾我諗到條絕世好橋
好啦,一於就咁咁咁,
不過要睇個天,
如果搏錯左,唔成功就冇架喇

之後約左呀雪喺xx商場其中一間餐廳食,
呀雪:「今次好似係同你第一次食晏 」
我:「係呀.」




呀雪:「學期初屋企人送飯,
之後同呀婷熟左就同佢食,
都未同過你食 」
我心諗,如果今日成功左,
以後日日食都得啦
我:「你以前一個人食唔悶咩?」
呀雪:「悶架,嗰陣未識人冇計啦 」
我:「咁都可以一個人出去食架,
又喺班房上堂,又喺班房食飯,
人都就嚟癲 」




呀雪:「媽咪話出去食咪又係味精,
不如送飯俾我 」
我:「睇嚟你細個應該好孱,
你呀媽先咁保護你 」
呀雪:「係掛......」
食飽飯就去吉之島行,
就咁睇啲野又好似真係平左好多,
呀雪話想買件粉紅色羽絨,
又幾襯佢





行下行下,
差啲唔記得左我今日出嚟要做乜
所以我決定……
同佢講不如去cafe買杯野飲,
佢都話好
行行下,
我問佢:「有冇廿蚊散銀呀?
我有兩張十蚊紙,想同你換呀 」
點解我要同佢換散銀
呢個就同我之前講嘅計劃有關,
話說我喺兩張十蚊紙上面寫左啲歌詞,
第一張寫左:「你是我將來,不捨不棄」
由於唔夠位關係要寫第二張
第二張寫左:「每一明天愛著你.」
冇計啦,




如果用把口講,
就諗唔到有咩情深說話可以講
我唔係情聖
平時又冇睇開愛情小說
只靠把口講好難冧得掂
冇計啦,做一次mk仔都要喇,
至於嗰兩張十蚊紙我喺兩面都有寫同一樣嘅野,
確保呀雪睇到
但點解之前要講睇天,要搏呢?
就係萬一佢冇散銀就大Q穫
不過之前見過佢出街有帶散銀
所以先咁樣搏,
呀雪:「咁怪架你,要散銀都有嘅,
好彩我有呀,你等我呀 」
好,搏中左,




不過同時都好緊張......
隻手硬晒肽
呀雪:「拿廿蚊散銀呀.」
頂住上啦,
我:「十蚊紙,哩度一張先.」
之後我就俾左「你是我將來,不捨不棄」嗰張十蚊紙佢先
我:「搵緊第二張,搵到喇,
拿第二張十蚊紙.」
俾埋「每一明天愛著你」嗰張佢喇
呢個時成隻腳狂震
但又唔想俾佢知我淆到咁樣,
所以扮到冇野咁,
呀雪之後睇到啲字,
我眼尾望落去佢好似好認真咁
呢個時候我個心狂跳




而且Feel到自己有啲熱,
呀雪:「你好無聊呀,錢你都玩 」
哎呀佢咁蠢以為我玩緊添,解釋下先,
我:「咩玩呀,我認真架,
呢啲野我唔識講出口咪寫出嚟囉 」
呀雪:「即係咩意思 」
我:「下咁你唔明咩?」
呀雪:「明呀,哩兩句係歌詞嚟嘛 」
我:「啱呀,你知呢?」
呀雪:「咁你同我講有咩意思呀 」
我:「因為我鍾意你.」
嗰陣我唔知點解好自然講左出嚟
可能我俾佢唔知我想點呢個反應打突左
所以就講左呢句野俾佢聽,
呀雪面紅紅講:「所以呢 」




我:「不如試下拍拖好唔好?」
呀雪:「你又知我實鍾意你 」
我:「唔知呀,咁你鍾唔鍾意我 」
呀雪:「蠢人,唔鍾意都唔對你咁好啦 」
我:「即係點?」
呀雪繼續面紅紅:「情人節整左成袋朱古力俾你丫,
又同你除夕出街喎,
你估我貪得意同得閒咩 」
嗰下我知有機喇,
但始終唔知佢肯唔肯做我女朋友
我:「哦,咁即係肯做我女朋友 」
呀雪:「你話呢 」
之後我諗下平時啲電視劇啲情侶出街係點,
我終於諗到喇,
原來係要拖手,
之後我二話不說拖呀雪隻手,
呀雪隻手好滑,好軟,
原來女仔手係咁嘅
我:「可唔可以拖一世?」
呀雪笑一笑咁講:「你好想拖一世咩 」
我:「想架,除非你唔俾我拖啦 」
呀雪:「咁如果日後你唔想拖呢 」
我:「唔會有呢件事發生 」
呀雪:「嘻嘻,行去cafe買野飲啦,男·朋·友 」
就係咁,我同呀雪拍拖喇,
我仲記得嗰日係二月廿三日
亦不得不服呀余睇得咁準
呀雪:「男朋友呀,你頭先好緊張呀 」
我:「係呀,你又知嘅?」
呀雪:「你隻手好多手汗丫 」
我:「但我唔放手架啵.」
呀雪:「冇人叫你放呀 」
買完野飮之後我地繼續行平時成日行嘅嗰個商場,
不過今次我同呀雪係以情侶個身分去行,
之前我地係以朋友嘅身分去行,
最大分別就喺呢度,
行左一陣,就諗住返屋企,
呀雪話不如去公園坐喺度傾下計,
之後,我收到一個好震驚嘅消息