[真人真事][校園][純愛]緣定·十年前: 第二十二章
除夕過左,
已經踏入左新一年,
新一年個重點係咩?
就係代表聖誕假就嚟完,要返學

以前我就梗係唔想咁快返學啦

喺屋企打多陣丁算

不過,
當我諗起返到學校又可以見到呀雪嘅時候,
不其然都會期待假期完嗰日架

講開又講,
小弟以前讀中學基本上冇試過唔返學同早退,
冇記錯只係試過兩次唔返學,
一次係因為要去喪禮,而另一次係因為生水痘,
除左呢兩次之外,
就冇試過唔返學,
我諗我係全校缺席率最低嗰個

咁點解會唔缺席同早退呢?
就只係因為想見到鍾意嘅女仔姐(真係好勁毒)

由以前嘅呀瑩,到後來嘅呀雪,
唔知點解嗰陣會意識到,
日後畢左業唔會好似依家讀中學咁

成日都有得見,
所以嗰陣日日返學就係想珍惜機會,
那怕只係見一眼,
都已經好足夠

咁返到學同放假之前個生活模式差唔多,
都係同呀余,呀雪同埋另外啲契弟玩,
放學會同呀雪去圖書館,
溫得夜就送佢返屋企咁,
有一樣我知你地想問好耐,
就係點解會唔調位嘅

事關Miss Chan(班主任)出晒名懶到出汁嘅,
當年我讀中一嗰陣,佢做同級另一班嘅班主任,
已經收到風全年都唔調位

要調都係個別同學調,
例如啲咩坐得太後睇唔到黑版,
但又唔Q戴眼鏡,
其實就賓周痕想坐喺啲女隔離索下女兒香

估唔到今年Miss Chan都係咁懶

唔緊要,可以繼續同呀雪坐

係難為左呀余,
要繼續坐喺好煩同好多口水嘅肥仔嘅隔離

跟住都冇咩特別野發生,
我就唔喺度講咁多廢話喇,
咁就講下班際足球

我地學校就好乸過癮嘅,
班際足球同班際籃球就冇分高級組同低級組,
即係中一生分分鍾要同中六鬥波(中七唔會玩)

衰啲講句鬥條鐵咩,
先講班際籃球,
叫個中一同中六打籃球,
淨係玩身高都贏啦頂你

再講踢波,
中一仔勁毛都未生齊同啲黑森林嘅中六仔鬥,
人地鬥勁毛都冇得輸

更加唔好講要一個中一生接中六生嘅射門

手唔跛算偷笑啦

都唔知邊個咁叻仔諗唔分組呢個規則出嚟,
咁我中一二嗰陣梗係唔玩啦,
都輸梗嘅玩嚟做乜

中三又啱啱踢波,
廢到hihi

俾人屠就棧自己攞嚟衰,
原本今年都唔諗住玩,
但諗諗下覺得自己啲技術好似好過上年

其他對手又烚下烚下咁

基本上有腳就好難輸

同埋之前聽過呀雪幾欣賞玩運動嘅男仔,
今年點都要威返次俾人睇,
咁班際足球就係喺平時學校用嚟上pe堂嗰個地方度踢,
規則係包埋龍門五打五,
我冇記錯嘅話嗰年中一至中六有十六隊參加,
中四,中五各五隊,中六兩隊,
另外四隊就係中一至中三嗰班傻仔,
十六隊以淘汰賽形式舉行,
上下半場各踢十五分鐘,
我地班就派我,呀余,之前講嗰個跑狗,同埋另外兩個茄喱啡,
嗰兩個茄喱啡平時間唔中都有踢波,
所以先搵埋佢地,
跑狗就純綷貪佢夠快,
另外嗰十五隊入面有一隊中五好勁,
我地唔貪心呀,有牌拎就得

我諗我嗰隊最好波嘅應該係我同呀余,
有幾個趴街仔講:「丁哥得唔得呀,今次唔係鬥打丁喎

我:「睇表演啦食屎狗

之後呀雪講:「丁哥踢波點可以唔支持呢

我:「你畫定banner預備舉都得喇,人稱xxx(我間中學名)朗拿甸奴就係我

呀雪:「個樣呀

我:「有冇人話你好幽默呀雪姐

呀雪笑住講:「講笑咋,加油呀

我:「睇表演啦

就係咁,
我係學校嘅處女比賽好快就開始喇.