[真人真事][校園][純愛]緣定·十年前: 第二十一章

我:「估唔到你都肯喺除夕夜食老麥喎.」
呀雪:「咩叫我都肯呀丁哥」
我:「冇,只係以為你地啲女仔唔會喺除夕夜哩啲大時大節食老麥姐,
諗住你地會想食餐廳嗰啲嘛」
呀雪:「咁你都見啦周圍都冇位,同埋唔怕同你講,我好少食m記架」
我心裡面彈左樹熊圖嘅嗰句野出嚟
當然嗰陣樹熊圖應該未面世住
不過真係估唔到有年青人係好少食老麥,
記得呀雪之前講過佢好少食街邊野,
依家加多樣老麥,




呢個人好古惑
當然哩句野冇講出口
我:「點解嘅」
呀雪:「因為屋企人話m記熱氣,所以叫我盡量少食.」
我:「食乜都會有事架啦,唔驚得咁多喎」
呀雪:「同埋係我細個比較孱,所以屋企人好少帶我去食m記,
久而久之到大個就好少去食.」
我:「即係你平時都好少去食m記」
呀雪:「少架.」
我:「唉見你咁少食,我分我啲薯條俾你喇.」




呀雪:「唔駛呀,你唔夠飽架」
我:「我都唔係好餓,費事嘥野啦.」
呀雪:「咁好啦,多謝你呀傻仔」
其實我就食得晒嘅,
不過對住鍾意嘅女仔,
梗係想俾更多嘅野佢架啦,
縱使只係一啲薯條都好
巴打們應該明白嘅.
 
食完之後,




時間都仲好早,
所以就決定去附近行下,
原本呀雪問我想睇咩,
佢話唔介意陪我睇我想睇嘅野,
但各位巴打絲都知道我最鍾意就係打丁
唔通我叫佢陪我去av鋪睇咩,
更何況個商場根本冇呢類型嘅鋪頭
所以我都係叫佢行佢想睇嘅野算
女仔想睇嘅野嚟嚟去去都係嗰幾樣,
最後佢去左睇衫,
呀雪一入到去間時裝鋪嗰陣,
比平時喺成班朋友面前更加活潑
同呀雪唔熟嗰批人應該估唔到佢有呢一面,
我諗我都幾幸運(自我感覺良好)
「嘩呢件好靚呀.」




「嘩呢件都唔差喎.」
「丁仔你話邊件靚呀?」
喺入面呀雪講得最多就係哩三句
不過我地走嗰陣佢係兩手空空咁行出嚟,
我:「呢件靚嗰件靚你又唔買?」
呀雪:「屋企仲有好多衫,而且又未爛,
睇下過下癮就好開心架喇」
佢呢個舉動令我又再對佢加分,
諗過度過先買,又唔嘥野,
當然鍾意一個人係盲目嘅,
鍾意佢就話佢識諗,
唔鍾意佢就話佢扮晒野,睇完唔買
我唔否認呢點嘅
 
行行下差唔多行晒成個商場,




但仲未到十二點,
呀雪問我去唔去公園坐下,
我話出面好乸凍喎,你唔淆呀
佢話佢今日著多左衫,唔使再要我除件羽絨俾佢,
咁我就話去啦咁,
頭先商場就多人到好似喺羅湖過關咁
依家公園雖然都仲有啲屁孩嗰度,
但空間感已經大返好多,
好過頭先多多聲,
突然之間,
呀雪問左我一個問:「丁仔呀,你有冇鍾意嘅人呀」
俾佢咁樣問一問,
我真係好想答佢:「有呀,咪你囉.」
但礙於我嘅毒勁性格,膽量又一般
所以答左:「冇.」




呀雪:「唔信,呢個年紀點會冇鍾意嘅人呀,
同埋你個眼神唔似.」
呀雪真係好了解我,
咁都俾佢睇得穿,
所以我唯有講真話,
我:「你咁醒呃唔到你添,
有呀,不過之前嘅事」
呀雪:「講唔講得架,
如果你唔想講就算啦,對唔住呀.」
我:「唔使對唔住,之前我鍾意4B班個呀瑩.」
呀雪:「哦原來係佢……」
我:「不過依家冇野咯」
我嗰陣真係冇勇氣同佢講我依家鍾意嘅就係佢,
因為好怕一講左出嚟,
而佢唔鍾意我的話,




就令我地個關係變差,
但我又知呃佢唔到,
所以就講呢單野出嚟,
我:「咁你呢,放心啦,我好守得秘密架」
呀雪塊面又紅左,
個口喺度嗡嗡下,都唔知佢嗡乜,
我:「算啦,唔勉強你喇,唔知邊個咁威水令你咁嗒糖呢?」
講講下,見到班屁孩同佢地嘅爸爸媽媽講新年快樂,
我地先意識到已經到左2007年,
呀雪:「新年快樂呀」
我:「新年快樂
都夜囉,送你返去?」
呀雪:「好呀.」
之後送到佢門口,
呀雪同我講:「今個除夕玩得好開心呀,
多謝傻仔.」
我:「凍喇返屋企啦.」
呀雪:「拜拜」
我:「拜拜」
之後我都返左屋企,
呢個除夕俾到我好唔同嘅感覺,
以往除夕我淨係喺電腦前打丁
雖然都開心,
但係同今次唔同,
今次嗰種係由心而發嗰種開心,
不涉及性慾,
有人講過食咩,去邊唔係重點,
同邊個去完成先至係關鍵,
我同意呢一句說話
今日我只係食一間平時成日食嘅麥當勞,
行一個平時成日行嘅商場,
但因為隔離有呀雪,
所以先會咁滿足,
但一諗起呀雪都有自己鍾意嘅人,
而又認為呢個人唔會係我嘅時候,
難免會有少少心酸嘅感覺