[真人真事][校園][純愛]緣定·十年前: 第十二章

話說呀雪好驚嗰份數學卷終於派左,
等緊嗰陣佢好驚,
拎左返嚟之後又唔敢睇
咁我就話:「做咩唔睇 」
呀雪:「驚考得好差囉.....不如你幫我睇 」
我:「好呀.」
之後我就睇左佢份卷,
有78分都唔錯喎(好記得係呢個分)
但又想玩佢,就決定嚇一嚇佢
呀雪:「點呀?係咪好低...... 」




我扮到安慰佢咁講:「唔緊要啦,今次唔得咪下次囉 」
呀雪:「真係好低呀?」
我:「我都唔知點講,我見你都好努力架喇,成績唔重要喎 」
呀雪:「唉次次都咁低分.」
之後佢睇佢份卷,
個表情由頹廢變成驚訝再變成微笑,
之後啤住我講:「衰人又玩人,差啲俾你嚇死呀 」
我:「依家咁咪幾好.」
呀雪:「好耐冇試過考數學唔係掹車邊合格喇,多謝你丫衰人 」
嗰下佢又展示佢嗰招牌笑容




真係好靚,
呀雪:「不如我地去慶祝囉?」
我:「你想點慶先?」
呀雪:「食魚蛋,嘻嘻 」
相信每位巴打絲打都會同自己身邊嘅人有唔少共同回憶,
個共同回憶可能喺其他人眼中係好簡單,
但只有你地先會知呢樣野有幾特別,
而我同呀雪其中一個共同回憶就係食魚蛋

放學後,我地就一齊去返嗰檔好好食嘅魚蛋,




今次到呀雪講:「老闆娘,兩串十蚊魚蛋唔該 」
老闆娘:「靚女係你呀,今次又同衰仔一齊食呀?」
呀雪:「係呀,你啲魚蛋好好食呀,咪再嚟幫襯囉 」
之後我準備俾十蚊出嚟,
呀雪就一手拎張廿蚊紙,
呀雪:「今次唔好同我爭,唔係你我冇咁高分 」
之後我地喺附近行左一陣,
然後照例送佢返屋企,
呀雪細細聲講:「其實你個衰人係把口衰啲姐,有時都幾好人 」
我咋聽唔到:「你講咩話 」
呀雪:「冇野喇,嘻嘻 」
我:「講啲唔講啲,冇品.」
呀雪:「又鬧人,想讚下你都唔得嘅 」
我:「即係你啱啱嗰句想讚我?」
呀雪:「冇喎,唔知醜.」




我:「唔知邊個啱啱話我把口衰但係有時都幾好人 」
呀雪:「冇呀冇呀冇呀 」
我地就係咁拗左一陣,
直至佢返屋企.

之後返學我地繼續一星期有四日留喺學校做功課加溫書
咁有一次見到呀瑩,
奇怪嘅係,
今次見到呀瑩冇好似之前咁個心係咁跳
冇咁緊張,
依家嘅我梗係知係咩一回事
但當時嘅我仲係一舊飯
所以就唔知點解會咁,
之後嗰晚我同呀余一如以往喺夜晚打機,
我問佢:「喂有野想問一問你.」




呀余:「有屁就放.」
我:「話說我今日見到呀瑩,
平時我見到佢嗰陣成個人會好緊張,
但今日完全唔緊張,
大佬知唔知咩事 」
呀余:「好簡單,我覺得係你冇之前咁鍾意人甚至已經對佢冇野 」
我:「原來係咁,信你架喇.」
呀余:「咁你鍾意左第二個?」
我:「我知你想講邊個,我都唔肯定自己係咪鍾意佢,
只係覺得同佢一齊好舒服.」
呀余:「你知自己想點就得啦,
繼續打機啦 」