[真人真事][校園][純愛]緣定·十年前: 第十一章

大家都知,
中學成日都傳緋聞
咁我第二日一返到去,
就有好多人抽水
話我同呀雪發展得好快點點點,
有幾個狗公行埋嚟潤我嗰陣個樣衰到呢
不過真係唔好睇少呀兒呢類人嘅威力
短短一日已經可以散播晒出去
咁其實我就冇乜野嘅,
因為嗰陣我仲未鍾意呀雪,




但呀雪就因為咁而成日面紅(我嗰陣唔知咩事)
仲紅過胖虎發嬲嗰陣
但依然維持每日msn加一星期一次行街(放早嗰日),
咁傳傳下傳得愈來愈勁,
有一日佢喺msn問我,
呀雪:「班同學日講夜講都好似仲未厭嘅 」
我:「講講下就冇人講架啦.」
呀雪:「你好似完全唔受影響咁嘅 」
我:「班口喺人度,我地控制唔到人地點講架,最緊要我地知咩事咪得 」
呀雪:「係呀......我地明就得.......」




之後都冇咩特別野講,
又係晚晚同呀雪msn,同呀余打機,再唔係就打丁,
好彩呀雪冇因為緋聞而同我有左隔膜

之前都講過,呀雪啲英文係好勁,
講啲音拍得住啲鬼婆
咁小弟個弱項就係英文,
加上我又懶,
而且我坐喺呀雪隔離,
唔使問呀貴,




就知我平時啲英文功課實係抄呀雪
咁有一次,
我照常抄呀雪啦,
抄完之後呀雪同我講:「丁仔你成日抄我,考試點算呀 」
我:「考試咪抄隔離囉.」
呀雪:「唔得呀,英文好重要架,唔識唔得架 」
我:「但真係好難喎,平時又冇時間 」
呀雪:「咁啦,不如我地每星期揀四日留得做功課? 」
我:「每星期揀四日咁癲?你有冇咁好死 」
呀雪:「我順便想操數咋,一三就我教你英文,二四就你教我英文 」
我:「好.」
呀雪:「嘻嘻.」
一來我放學冇乜野做
二來靚女約到
三來我真係想學下英文




咁落緊去學校圖書館嗰陣,
我地又撞到呀兒,
呀兒:「今次你地轉移地點留喺學校行呀 」
一講完呀雪又秒速面紅,
我:「唔好玩人喇,個個似我咁大方咩 」
呀兒:「呀雪塊面紅到咁,唔玩你地喇 」
之後呀兒就走左,
我:「胖虎,行囉.」
呀雪:「咩胖虎呀 」
我:「你有冇睇叮噹呀?」
呀雪:「有呀,做咩?」
我:「每次胖虎發嬲嗰陣,塊面就超紅,
同你面紅嗰陣一樣 」
呀雪:「衰人又玩人.」
我:「胖虎胖虎胖虎.」




呀雪:「衰人衰人衰人!」
之後入到去就做功課,
做完之後呀雪就教我英文,
佢問我英文識啲乜,
我:「我淨係識I am a boy就冇喇 」
呀雪:「認真呢?」
咁我就講我識呢啲呢啲,
佢之後就教我結構同生字,
佢教我嗰陣嗰樣又係冇得輸,
之後就送佢返屋企,
因為我地六點先走,
行行下,呀雪講:「其實你啲英文都唔係好差,個底唔錯呀 」
我:「你講得都唔錯呀.」
呀雪:「係咪真架?你知你成日亂嗡.」
我:「真架.」




事實上佢教得真係唔錯,
之後我地維持呢個活動足足有一個學期