[真人真事][校園][純愛]緣定·十年前: 第十三章

時間都去到十一月喇,
講返少少當時嗰環境先
呀雪同班上人都開始熟絡起來,
當然身邊亦都有唔少狗公獻慇懃
而呀雪個反應唔係好熱情
但又唔會好冇禮貌咁鬧班狗公嘅
不過班狗公送俾佢嗰啲野食,
佢會襯班狗公睇唔到嗰陣益我食,
諗起都爽死.





另外,
之前咪講過呀雪係屋企人送午飯俾佢食嘅,
衣家佢可能識多左朋友,
佢午飯會同一個同班同學(叫呀婷)出去食,
呀婷都係一個幾靚嘅女仔,
唔算特別矮,冇呀雪咁白但都唔算黑,
獨立睇其實都算白淨,
身材就唔錯嘅,
應該有嘅地方都有,
而且性格亦都好好,




好友善,基本上佢能力以內做到嘅都會做,
俾人個印象熱情過呀雪,
我形容得咁好,
不過就唔係我杯茶(人地都對我呢個毒勁冇興趣),
呀婷佢同呀雪應該係好好朋友,
成日都一齊,
不論小息,去廁所定午飯都係孖住一齊,
不過我地放學喺學校溫書佢就冇去,
至於點解會介紹呀婷呢,
遲下會講.





去到十一月,
大家都知有咩事發生,
就係秋季旅行,
年年我地秋季旅行就係燒野食,
我自己就唔係幾鍾意燒野食,
燒就有排燒,食就好快食完(我本身食野快),
都係打邊爐正,
烚下烚下就食得,
咁由於我地班有廿八人,
就分成七組,每組四人,
咁決定分組之前嗰一晚,
呀余打打下機同我講:「聽日不如我加你加呀雪加呀婷一組?」
我:「冇所謂,但佢地冇組咩?」
呀余:「你同呀雪咁frd,呀雪又同呀婷孖公仔咁,實得嘅.」




我:「你條友古古惑惑咁,冧人呀?」
呀余:「你又知我冧人?」
我:「平時你對分組點會咁有熱誠,點呀,冧邊個呀?」
呀余:「放心啦唔係呀雪.」
我:「幾時對呀婷起痰?」
呀余:「近期嘅事姐,靚得嚟又唔係八婆格.」
哩個就係我之前介紹呀婷嘅原因喇,
呀余:「我連聽日分組嘅對白都諗埋,大佬睇你配合.」
我:「講嚟聽下.」
呀余:「首先你問呀雪一唔一組,
我估佢九成九肯,
之後再問佢有冇人入組,
咁我猜測佢都係會帶呀婷入嚟,
而呀雪知我同你frd底,加上差一個先夠四個,
你就順便帶我入嚟,完美.」




我:「咁你都諗埋,唔配合唔得啦.」
呀余:「輕鬆.」

咁第二日上班主任堂就決定分組啦,
但係,
臨場同呀余個劇本唔同,
反而係呀雪即刻問我同呀余會唔會同佢同呀婷同一組,
咁我梗係答會啦,
不過呀余就慘啲,
度左好耐嘅劇本原來用唔著,
之後放學我地四個就坐喺學校傾下關於聽日燒野食嘅野啦,
由於得一日準備,
所以我地四個就決定分開兩組(兩個一組)買,
原本我以為係我同呀余一組買碳,
呀雪同呀婷就負責買野食,




點知呀雪同呀婷話一男一女去買好啲,
話咁樣會令我同呀余都可以去揀下野食,
唔使齋拎碳咁悶,
呢個時候冇理由唔幫呀余一把,
我就話:「我同呀雪熟啲,我地一組買啦.」
呀婷:「估到你啦,咁我同呀余一組啦.」
之後我地嗰日就冇溫書,
直接去街市買野食同碳.