[真人真事][校園][純愛]緣定·十年前: 第九章

我一返去就搵呀余打機
我:「打得.」
呀余:「溝完女喇咩?」
我:「你就溝女 佢好驚聽日份小測,又出到口問我可唔可以教下佢,
坐隔離唔幫佢又好似唔係咁好喎,咁咪幫一幫佢囉 」
呀余:「平時又唔見你咁好人 」
我:「咁話晒始終係靚女,好難唔好人嘅 」
呀余:「知你係咁狗啦,不過我見到佢真係同你特別多野講
可以諗下呀 」
我:「遲啲先算啦 打機啦,你再唔打機我就打丁架喇 」


呀余:「日日打丁遲早打到腎虧.」

咁之後我地就打機啦,
打到食飯,
咁食完飯諗住埋位再打嗰陣,
見到有人msn加我
我睇個e-mail名知佢係呀雪,
就同呀余講:「呀雪又搵我教佢,聽晚先再打,sor呀大佬 」
呀余:「好呀,唔阻你溝女 」
我:「食屎啦你.」


之後我加左呀雪做聯絡人,
我:「sor啱啱去左食飯 」
呀雪:「唔緊要......你依家得唔得呀?」
我:「得呀做咩?」
呀雪:「我想你講多次聽日測嗰課嘅重點......
我驚自己又唔記得...... 」
我:「一罐可樂 」
呀雪:「好......」
我:「講笑姐,我點似咁衰呢.」
呀雪:「衰人又玩我 」


後來發覺佢成日講"衰人",
我:「唔玩喇,有咩想問呀......」
呀雪:「呢度呢度唔明呀.」
我:「嗱,你先咁咁咁,再咁咁咁,咁就計到架嗱.」
呀雪:「唔該晒你呀.」
我:「我記得本書有好多呢啲題目可以做,
你做到自己覺得識就搵我啦,睇下你啱唔啱 」
呀雪:「好,咁我依家開工.」
當時未鍾意呀雪嘅,
只係一心諗住幫一幫佢姐,
自己又得閒,
加上屋企有人又打唔到丁
咁我之後上左陣網,
上上下網呀雪就震我喇,
呀雪:「做左1-10題,我衣家打出嚟,你睇下啱唔啱 」


跟住佢就順序打左十個答案啦,
我睇完之後就同佢講,
我:「啱晒呀,有啲料喎 」
呀雪:「多謝你丫 」
我:「其實唔使咁驚喎,小測姐又唔係考試.」
呀雪:「唔係呀,我由細到大數學都好一般,慢慢就驚左數學喇......」
我:「係咪吹水咋,頭先你都啱晒呀 」
呀雪:「有你教住提住我好啲姐,希望聽日唔會又唔記得啦 」
我:「冇事嘅,最多咪肥佬 」
呀雪:「就係唔想肥佬. 」
我:「咁講啦,我睇你識做嗰啲題目呢,就唔會肥佬嘅,
除非你考考下暈左就另計啦 」
呀雪:「又咒人 」
我:「唔講邊有得笑.」
呀雪:「係喇,你同呀余係咪好frd?成日見你地一齊 」


我:「係呀,由中一識到依家」
呀雪:「唔怪得你地咁有默契啦.」
我:「咁你嚟左呢間學校都有半個月,又覺得點 」
呀雪:「幾好呀,啲同學都幾nice,起碼冇小圈子.」
我心諗,成班狗公喺度,點會對你唔nice
我:「咁咪幾好囉.」
呀雪:「平時你玩咩多架?」
我差啲輸入左"自瀆",好彩收得返......
我:「同呀余打機啦,間唔中踢波啦 」
呀雪:「原來你會踢波架 」
我:「咩叫原來你會踢波 」
呀雪:「以為你平時唔做運動嘅添.」
我:「你就唔做運動,不過唔係成日踢囉 」
呀雪:「咩叫你就唔做運動 」
我:「抄我講野?」


呀雪:「得鬼閒抄你,我平時間唔中有打羽毛球架 」
我:「間唔中即係一年一次?」
呀雪:「冇咁耐囉 」
我:「你跳得郁咩?」
呀雪:「你就跳唔郁!句句窒住晒 」
我:「你都未見過我英姿,見過就唔會話我跳唔郁,
不知幾勁 」
呀雪:「上PE堂或者遲下啲班際有機會嘅,
係呢,你仲有咩其他嚐好?
我:「聽流行歌咁囉?」
呀雪:「我都好鍾意聽流行歌!
你聽開邊個 」
我:「好多廣東歌都有聽,主要聽eason,女歌手聽千嬅同stephy 」
呀雪:「stephy我都超鍾意! eason就少聽啲.」
我:「得閒聽下喇 」


呀雪:「好.」
我:「掛住講都未沖涼,沖完都訓喇,拜拜.」
呀雪:「聽日見喇拜拜 」
沖完涼上到床諗,
估唔到由原本冇野講到拎左msn吹水,
個轉變一下子太快,
不過當時只係覺得係一位幾好傾嘅新朋友,
冇其他非分之想,
始終毒男最忌有自信