[真人真事][校園][純愛]緣定·十年前: 第八章

開左學半個月多啲啲,
個數學老師話開始要小測
我心諗使唔使咁快呀
之後真係聽到呀雪講:「唔係嘛,咁快要小測......」
我:「你驚咩姐高材生
哦,我知喇,
你係諗住依家扮驚扮唔識之後拎勁高分嚇人 」
呀雪:「唔係講笑架,真係唔識呀 」
我:「但係平時見你上堂做堂課都識做呀.」
呀雪:「做堂課對住做先識架咋 」


我:「我估小測唔係好難嘅姐.」
呀雪:「但都係冇乜信心......
你今日放學得唔得閒呀 」
我見佢又出左個可憐樣,
唔通話要返屋企打丁唔得閒咩
咪話:「好,但唔肯定教得好架.」
呀雪:「講左點都好啲嘅 」
見到佢放鬆嗰個樣真係好搞笑

放學後,


呀余:「丁仔,一陣返去打機.」
我:「你地返去開住一場先,我後入 」
呀余:「做咩要後入呀 」
我:「我要去圖書館教呀雪數學.」
呀余:「為左女而唔打機,咁你後入啦 」
我:「好快 」
之後我地落到圖書館,
竟然見到呀瑩同佢個女仔朋友喺度,
我呢啲小毒勁梗係緊張起嚟
同埋為左避開同呀瑩嘅眼神接觸,


就特登背對住佢坐,
咁之後就教呀雪數啦,
教乜就唔多記得喇,
唔講咁多啦,
不過發現佢唔係咁差嘅,
係個問題掉轉少少問就唔識答,
其他都唔錯
之後自己出左幾題俾佢都識做,
呀雪:「丁仔,唔該晒你呀.」
我:「唔使,我助人為快樂之本 」
呀雪:「嘻嘻,傻仔 」
我:「老老實實,其實你明唔明架?」
呀雪:「你講完之後好左好多喇,係驚返到屋企又唔記得 」
我:「咁不如留低喺度溫多陣?」
呀雪:「唔好喇驚阻到你,俾你msn我好唔好呀?」


原本我諗住話唔阻呀
但佢主動問我拎msn就緊係揀呢樣啦
我:「好呀,[email protected]」
呀雪:「唔該晒,今晚add你.」
我:「咁衣家走啦,係喇,你餓唔餓呀?食啲野好冇呀?」
呀雪:「好呀,但我唔知附近有咩食啵 」
我:「你嚟左呢度咁耐都唔知有咩食?」
呀雪:「咩喎,咁平時我係屋企人帶飯架嘛.」
我:「唉,所以話你咁就唔得啦,附近有檔魚蛋好好食,行啦 」
呀雪:「嗯 」

起身嗰陣同呀瑩對望左幾秒,個氣氛好怪
之後就同呀雪離開左學校,
行去魚蛋檔嗰陣大家都有傾有講,
呀雪:「估唔到你教人都幾好 」


我:「唔係掛,我不嬲唔識教人.」
事實上我到依家都覺得自己係唔識教人
可能係因為自己唔鍾意教人,
我寧願幫你做都好過教你做
所以我聽到佢話我教人幾好覺得好奇怪,
呀雪:「唔係呀,我覺得你講啲野好易入腦 」
我:「係咩,可能人夾人緣掛 」
呀雪即係頭耷耷咁講:「咩人夾人緣呀,你講咩呀 」
我笑笑口咁講:「咪教學上人夾人緣囉,唔係你以為咩呀.」
呀雪:「衰人,又玩人 」
我:「我係衰人你仲會唔會跟我行呀?」
呀雪:「唔知呀唔知呀 」
我:「前面就係嗰間魚蛋檔,五蚊五粒,你食幾多 」
呀雪:「五蚊得啦,一陣仲要返屋企食飯.」
我:「我就唔理你喇,我食十蚊.」


之後我就同老闆娘講:「靚女,要五蚊魚蛋同十蚊魚蛋唔該.」
老闆娘:「靚仔,今次帶埋女朋友嚟幫襯添呀,幾省鏡喎 」
我:「我女朋友咪你囉,唔好玩人呀,人地啱啱嚟呢頭讀書咋,今日就帶佢嚟你呢度喇 」
老闆娘:「咁多謝呀,好啦,就一人俾多一粒你地啦 」
拎完之後呀雪同我講:「你同老闆娘好熟架?」
我:「係呀,細細個已經食開架喇.」
之後呀雪喺佢銀包拎十五蚊出嚟俾我,
呀雪:「呢餐當多謝你今日幫左我 」
我:「唔使喇,我未衰到十五蚊都俾唔起 」
呀雪:「咁我俾返我嗰份得喇掛.」
之後佢一手捉我隻手塞左個五蚊落我隻手度,
我嗰下呆左一呆
我:「估唔到你又幾好家教架喎.」
呀雪:「嘻嘻.」
我:「不如一路行一路食啦,唔想咁夜返屋企 」


呀雪:「好呀.」
我:「你住邊呀,唔遠嘅話我送埋你返去,廢事你俾隻狗"擔"左返屋企.」
呀雪:「邊有狗仔可以"擔"個人架 」
我:「講下笑姐,行啦.」
呀雪:「好.」

呀雪:「啲魚蛋真係幾好食 」
我:「咁快擦我鞋?」
呀雪:「讚你識食又話我擦鞋,成日都諗得咁負面 」
我:「係咁架啦.」
呀雪:「不過我都好少食呢啲街邊食物.」
我:「點解嘅 」
呀雪:「平時屋企人話街邊食物唔乾淨.」
我:「食少少死唔去嘅 」
呀雪:「其實我都覺冇乜野嘅,係佢地唔想我食咁多 」
我:「咁咪趁放學食囉.」
呀雪:「嘻嘻,你啱,我到喇.」
我:「原來你住呢度,有錢女喎 」
呀雪:「又講呢啲啦,今晚msn見,拜拜 」
我:「拜拜.」
之後我都返屋企搵呀余佢地打機