失戀200天後,我遇上的女孩們: 第三十三話
「你今晚得唔得閒出嚟食飯?」我打開whatsapp,send左個短訊俾佢。依個係我兩個月以來第一次俾佢既whatsapp,佢個頭像...已經唔係果個...
「好,幾點?邊度?」
於是,我就約左Tracy係佢屋企附近既餐廳食飯。佢今日著左件淺藍色長袖裇衫加條牛仔短褲,著對白色布鞋,加上化左淡妝,同我地第三次見面一樣。
「做咩咁好約我食飯呀?咦?我仲以為你約埋Mandy添!」
「我同佢...成個禮拜都無講野...」係,自從果晚之後,我同Mandy又變返陌路,佢見到我好似見鬼咁,走都走唔切。
「咁點丫?你今日約我出嚟...」
「其實我想...」我想結束依段三角關係...但係我講唔出口...
「可唔可以俾我講先呀?」我點頭同意,「我想...結束我地依段關係...」
「吓?」依刻我唔敢相信自己耳仔...
「我話。我想。結束。我地。既關係!」佢逐個字好大聲咁講,大到隔離檯都望左一望我地...
「果次你暈左...Mandy...佢好緊張,喊晒口咁嗌救命...又四周問人有無白花油,又唔敢行得太遠,又話要叫白車...我叫左佢冷靜啲,但佢對眼好似缺堤咁,又話緊張到天旋地轉咁,我就叫佢去呼吸新鮮空氣,過一陣你就醒喇...」
聽完依段話後,我唔知應該講咩好,唔知俾咩表情...而Tracy就搶住講...
「人地咁緊張你,你就唔好辜負對你有心既人喇!」似曾相識的一句...
「咁你呢?」
「你又係咁!佢又咁!你地真係一對!」我露出唔係好明既表情,「你地兩個理下自己好唔好?成日淨識顧人地,有時係無可能樣樣野都可以好完美嫁!」
其實佢講得啱,我地三個搞到咁,唔多唔少都係因為我太過偽善既關係,我以為自己唔會傷害佢地,但即使無做任何野,我卻已經不知不覺咁傷害緊我地三個...
「其實...你地都係唔想我傷心先唔想再一齊啫!我無事喎!」
「我...唔係呀...」其實諗返轉頭,我係有多少憐憫佢先對佢有好感...
「你又嚟喇!要我講幾多次你先明啫!我大個女喇,唔須要你地再替我操心啦!」我明佢講既「你地」唔單指我同Mandy...
「其實我同Mandy去臺灣之前,我係網上識左個臺灣男仔...其實我去臺灣係想見佢,知不過叫埋Mandy一齊去啫!」
「哦...咁佢點嫁?好唔好?」
「佢幾好既...佢係果邊開民宿同cafe既,咁果次咪旅行順道見佢囉...」
「嗯...」從佢表情睇得出佢唔係講大話,細心留意佢的確比之前開朗左。
「好喇!我既野你唔使再擔心喇!咁你地點呀?」
「唉...我都唔知點,想同佢講野佢又唔睬我...」
「使唔使我幫手呀?解鈴還須繫鈴人...」
「咁...唔該你先...」其實我都覺得自己好窩囊...
「好喇,咁食野先!」
食完飯後,我送佢返屋企。途中我地傾返呢兩個月發生既事,原來佢返到大馬之後,就係果度住左一個月左右,但始終佢老豆仍然迷信既關係,佢無奈下返左香港,咁就同Mandy熟左同識左臺灣男仔,跟住就唔多講喇...
「你仲係咁咸濕...」依個係佢對我呢兩個月所做既評價...
「點都好...見到你快樂我就開心喇!」依句我真心講...
不知不覺已經到佢樓下,我亦唔送佢太多,而當佢行開左不遠後,突然轉身走向我,我以為佢想嚟個最後擁抱,於是我攤開雙手準備迎接佢,點知...
「你。以。後。要。對。Mandy。好。啲。啊,唔。係。我。就。返。嚟。搵。你。算。賬!」佢每講一個字就踢我上五吋下五吋一腳(Mandy仲要踢兩腳),我兩隻腳即時又紅又痛。然而,佢下一秒卻緊緊攬實我。
「唔好郁!」佢知我想攬住佢,我雙手只好輕搭佢膊頭...
「好喇!」佢慢慢鬆開我,聲音有少少沙啞講:「你要抱既唔係我,係Mandy!」
「啊!我差啲唔記得俾你。」我係袋度攞左隻DVD出嚟,係上次佢同我睇果套,「我都仲未睇,唔知有無第二個結局...」
「我睇左喇!」
「噢...咁有無?」
佢望一望我,再望一望隻DVD,「唔話你知,等你心思思!」
「你都唔係我既王子,我要去搵我既王子喇!」臨走前佢講左呢句...
原來佢幾日後就飛去臺灣,當然我同Mandy都有送佢機。
「你要睇實個咸濕佬啊!」依句係Tracy同Mandy講,臨入禁區前,佢地仲傾左一輪(可惜我聽唔到,但直覺話我知關我事)。送完機後,我同Mandy一齊搭車返屋企。途中我地都無乜點講野,直至去到佢屋企樓下,我決定結束依個尷尬氣氛。
「我有啲野要同你講!」我捉實佢雙臂唔俾佢走。
「可唔可以遲啲先?我....」
「唔得!」我斬釘截鐵咁拒絕,「以前我成日以為即使錯失左一次,第日可能會再有一次機會俾我,但...經過咁多事,原來錯失左就唔會再有機會,所以我而家一定要話俾你聽:我。愛。你!」
我好用力攬實佢,怕佢會走左去一樣。然而佢拍一拍我背脊,係我耳邊講左一句...
「吓...咁我係度等定跟你上去?」面對佢咁既狀況我有啲不知所措...
「傻瓜...我唔理你上去先...」佢面有少少青,轉身急急步走...
「等埋我...我陪你上去丫!」
佢頭先講...
「我頭先唔知係唔係食錯野,而家個肚攪緊,可以俾我返左屋企去左先呀?」