失戀200天後,我遇上的女孩們: 終話
「你幾時同人結婚啫?」Tracy一邊拉花一邊問我。
「結咩婚啫?都無人同我求婚...」我開玩笑咁講,佢差啲一柸latte車落我頭度...
「我個仔連媽媽都識講喇,你仲等?你想等到我生埋第二個先呀?」
無錯,Tracy過左嚟臺灣一年後,佢就同臺灣仔阿倫結婚,再一年後佢生左個仔叫日朗,而三四年後既今日,佢又有左三四個月。佢話依胎係仔既叫日晴,女既叫星晴(希望係女喇,星晴好聽過日晴多多聲)。
「依個係...心嚟嫁?」我指住柸latte,估緊拉花既圖案係咩。
「貓嚟嫁...唔似咩?」
「唔似...」
「唔好攪住,影張相先!我學左兩三年嫁!」你係唔係要檢討下你既資質呢?
正當我想將柸latte飲落肚時,一個膚色好黑又高大,充滿陽光氣息既男人入左嚟,佢就係阿倫。
「你怎麼還在這裡?還不出發就趕不切的...」阿倫對住我問。
「他去那裡?」Tracy插口問。
「墾丁嘛,他不是要拍結婚照嗎?」阿倫一臉疑惑問Tracy,「你不知道嗎?」
「你求左婚喇?」Tracy睩大對眼問我,「幾時既時呀?」
「尋晚...本來今次嚟呢,係想俾驚喜佢既...個計劃係同佢係度旅行兼影相既,咁就係影相中途就向佢求婚,點知自己守唔到秘密,發開口夢講左出嚟...咁咪順手求埋婚囉...」
「點解話俾阿倫知但唔話俾我知?」Tracy有啲嬲...
「同阿倫講佢幫我安排嘛,同你講咪Mandy都知囉!哪裡有經期(驚喜)?」我用唔咸唔淡既國語講。
「不要再聊吧,出發喇!」阿倫用佢有限既廣東話發師號令,興奮程度同我差唔多。
「其實我有啲野唔係好明...」
「有啲咩唔明呢?」揸機既Eric好奇地問...
「明明我住果度,行過嚟依度都係兩三個字,點解仲要坐車既?仲有...」我指住車頭一對公仔,「點解熊人配兔仔既?諗下熊人成隻擒落隻兔仔度...」
「其實我都唔明...」阿明插嘴講,「點解你結婚又關我地事?仲要一大早七點起身準備...」
「傳統啲野我地識條鐵咩?食個早餐先啦!」Alan攞左啲早餐嚟頂肚。
「呢段會剪果可?」我問Eric。
「應該會掛?」
「咁食完去接新娘喇!」
今日係我迎娶Mandy既大日子,而家就同班兄弟團係樓下拍野同準備...
「嗱,阿嫂!我地成班兄弟尋晚就睇實佢唔俾佢去滾,仲要佢齌戒沐浴,等你可以安心享用!」享用?
「嗱!阿明,尋晚見住你禁電話,洩露軍情呀?」
「咩呀?肥仔尋晚夠雞啄唔斷講電話喇!」
依個米芝連肥仔就係Coco既新男友,拍左兩年,今日負責拍野既(而Coco就係伴娘)。話說肥仔去Coco間診所睇牙時,無啦啦同Coco講佢好香,跟住經過一輪食飯睇戲追求後,終於都係埋一齊,而家如膠似漆咁。
「開門利是九萬九千九百九十九...」成班姊妹異口同聲一齊開價...
「嘩!去搶呀?」
「平左嫁嘞!結婚就唔好咁孤寒啦!」呢句邊個講嫁?同我拉出去打!
「嗱,依度一千蚊唔使找!」
「仲有野做嫁!」
經過一輪愛的宣言呀(都係啲愛佢一生一世呀,俾晒份人工果啲喇!),掌上壓呀(當然兄弟頂喇)果啲之後,被班姊妹玩到暈陀陀既我終於都迎接到我既老婆--Mandy。佢著住白色露肩婚紗,簡單而漂亮。
「哥哥姐姐恭喜晒!」我地既花女係貝兒,而Jessica都終於俾佢等到貝兒個爸爸。果然同我想像既係同一個人,自信既笑容。不過唔知係唔係因為佢父母既遺傳,貝兒已經識得逗人開心,聽Jessica講佢係學校已有三四個男朋友...真係人細鬼大!
「恭喜晒!對唔住,有野做嚟唔到,祝你百年好合,永結同心!」
「唔緊要,多謝你!」係Belle既whatsapp,聽佢講而家佢仲係單身,而且早已經忘記左果條友,雖然佢話自己一個人自由自在,但我知道佢仍然渴望愛情,作為朋友,我亦希望佢搵到幸福。
「邊個嚟嫁?」Mandy見我禁手機,好奇咁問。
「朋友啫,佢話嚟唔到飲喎!」
「嗯...佢地趕唔趕到嚟呀?」
「今朝佢都whatsapp我話中午機,如無意外應該趕到。」
Tracy同阿倫係臺灣飛過嚟,由於佢地啲仔女要安排俾老人家湊,所以今日先嚟到。講開佢地真係幸福,雖然唔係話大富大貴,但間民宿同咖啡店都可以搵到食唔使憂,最重要既係佢一家人健健康康,睡公主已經過緊幸福快樂既生活喇!
「我,郭英偉願意娶你林慧勤為合法妻子...」
「我,林慧勤願意嫁你郭英偉為合法丈夫...」
一生一世既承諾...
這是一首簡單的小情歌~唱著人們心腸的曲折~
我想我很快樂~當有你的溫熱~
腳邊的空氣轉了~嗚啊啊~
音樂響起,我同Mandy手牽手步入會場,由依一刻開始,我地正式步入人生既另一個階段,一個唔只我地,將會有更多成員既將來...
多得Eric老婆,我地先可以用員工優惠價係酒店擺酒,聽Eric同烏鴉講,老蘭果度都無咩點變,阿Sam都仲係花花公子,Peter仲係慣左夜浦,就好似世界點變,有啲野就千古不變,男同女亦都一樣,兩個生命在一個相交點遇上,有人係老蘭,有人係工作既地方,有人係其他地方,之後相識,有人結合,有人分離,這就是人生...
「喂!諗咩呀?攞住喇!」Mandy將手上既一袋二袋俾我拎,全部都係BB衫同用品。
「嘩!使唔使買咁多呀?上次照過得一個咋喎!」我既孤寒性格又出嚟...
「BB衫好快換嫁咋!個女你有份嫁,唔好咁孤寒喇!係喎,你諗住叫咩名?」
「亞男囉...」男女都用得...
「亞藍...幾好丫,咁叫咩藍呀?」
「亞男咋!」
「喂...你改名就認真啲喇,第時你個女嬲你一世...啊...啊...老...老公...」Mandy好痛苦咁揑住個肚同我隻手,由我隻手傳來既痛楚令我身同感受佢既痛。
「老婆...你唔係而家嘛?你冷靜啲先...啊...深呼吸...我叫白車...啊...」
「恭喜晒!BB女健康嗎?」Tracy係whatsapp傳來恭喜。
「嗯...母女平安,BB女有八鎊重...」
「嗯...改左名未?」
「叫亞男...」
「你知唔知我中文名叫咩?」
「唔知...」講真咁多年我都未問過佢中文名...
「亞男...你個女一定嬲你一世!」唔會掛...
「姑娘!我想改返我個女個名叫海藍丫!」