失戀200天後,我遇上的女孩們: 第三十二話
「哦!咁你而家反而唔知點做好!」阿明聽完我既近況之後,得出依個結論。
果晚之後,無論Tracy定Mandy我都無主動聯絡,我驚我行近是但一方,另一方就會受傷,而最差既後果就係三個都受傷...
「係喎!你過嚟做咩嫁?」
「我個邊有人出左去幫手整機,我過嚟借人既,順手俾呢樣野你既!」佢係手度攞出一封「紅色炸彈」出嚟!
「嘩!你咁快丫,搞大左人地個肚呀?」我打開一睇,「吊!原來係Alan既...」
「我似咁唔小心咩?係結既,我就一定俾個幸福快樂既家佢先既!但係Alan難講啲,佢真係搞出人命...」
「仆街!今個月破產啊!」我係櫃桶攞出另一封「紅色炸彈」,係Eric既。事源Eric上次同個酒店餐廳女PR食飯,打埋下半場,加時不特止,仲要射埋十二碼入左,於是就出現依封「紅色炸彈」嘞...
點解啲男人咁唔小心嫁,買個袋唔係好貴啫,咁就搞出人命嘞!最慘係我依啲無辜既,年中被你地炸死唔知幾多個!
「其實貝兒係唔係你親生嫁?你唔使湊女嫁咩?」
「我地兩個成個餅印咁,咁仲話唔係親生?」
老實講...唔似...
「今日星期五,你就唔好咁掃興啦!」Jessica一大啖飲左半柸雞尾酒,我相信依柸唔係佢既第一柸。
習慣真係會成自然,本來今晚打算返屋企既,但係無野做又加上星期五晚,於是落老蘭行下,咁啱就撞到Jessica,見佢一身戰鬥裝行到唔行,作為正常男人既我,拜倒於石榴裙下是常識吧!
「不如講下你啦!點呀?兩個女仔,你鍾意邊個多嫁?」又係依條問題...
「其實...係唔係一定要邊個愛多啲就要同邊個一齊?假如愛係有得計既話...對唔住,我唔識計...」
「嗯...可惜香港唔可以有兩個老婆,而且佢地未必會一齊分享你個心!」
「你講到好恐怖咁...分享我個心...」我仲將手指好似手術刀咁係心口畫一畫,仲扮將個心拎出嚟咁。佢即時哈哈大笑,啲笑聲...我相信貝兒係佢親生女喇!
「你不如認真答我...」
「我都話被人強姦有左貝兒咯...點解你唔信啫?」我未問佢已經搶左答...
「雖然希特勒講過大話講超過一百次就會成真,但有啲野係就係,唔係就唔係。趁而家人少少,你講左事實出來聽下啦...」無可否認,我係八公一名,尤其係對唔關自己事既更加關心。
「我係唔講,吹咩!」
「嗱!同你玩個遊戲,我贏左你就要講俾我聽!」我攞左副啤牌出嚟,將鬼卡同其中一張普通卡放左落黑色布袋度,「嗱,邊個抽到鬼卡就邊個贏!」
「咁我贏左點先?」
「你話做乜我就做乜,除左犯法野...」
「好!」佢伸手抽左張牌出嚟,係普通卡...
「吊!」我第一次聽佢講粗口...
「幾多年呢?」佢深一下呼吸,「差唔多八年?唔記得喇...」
「果時我仲啱啱出嚟做野,依間吧都未有,一收工我就出嚟同班同事浦飲野。有次個同事唔得閒,於是我就自己一個落吧,果時真係唔識死...」
「跟住...」
「跟住?我被人落藥囉!」
「你唔係就咁被人...」
「唔係...好彩有個人救左我。」
「其實你講野可唔可以一次過講晒呢?」
「咁...當我醒返時,就見到有個男人坐係我身邊,我見自己無穿無爛就知佢無搞我。跟住佢解釋返同講左你上次差唔多意思既野就走左。果時就好感激佢同對佢有啲好感,於是晚晚落吧睇下再撞唔撞到佢。過幾日,真係撞到佢,但佢又好似特登疏遠我,咁於是我就特登係佢身邊扮飲醉,希望佢會注意我。開頭幾次佢都無理我,直到某一日,佢獨自坐係角落,眼神流露出佢少有既迷惘同悲傷,連平日自信既笑容都消失埋。果日我無扮醉,淨係坐係佢身邊陪佢飲酒...於是...」
「佢就係貝兒既爸爸?點解你話你被人強姦既?」
「佢同我講,佢係個靠偷呃拐騙維生既人,唔值得有一個屋企,話當果次被人呃被人強姦咁,唔好掛念佢喎...」
「我覺得係男人趙完鬆既藉口嚟...」
「其實之後,我一直搵唔到佢,都懷疑過佢呃我,但...唔知點解...我覺得佢係有苦衷既,於是就晚晚落吧希望搵到佢,聽佢解釋,直到知道有左貝兒,我就無再搵佢...」
「但你而家又係度既?」
「真係唔知點解依一兩年有預感會搵到佢,於是又開始浦返吧。其實我唔係想佢負責任或者咩,而係因為佢曾經講過,因為佢犯錯而害死左至親既人,而令世上再無親人掛住佢...但係而家佢有,我最想話佢知而家佢有親人掛住佢,佢再唔係自己一個...」
Jessica講完將剩低既半柸雞尾酒飲埋,再想要多柸時卻被我阻止...
「本來我叫Jess既,而佢最掛念既人叫Jessica,我想成為佢...成為果個Jessica...」
「假如有人好似你咁樣對我...」我無講落去...太多安慰說話會變得麻木,失去佢既功效...
「哈哈...依兩年我落過各式各樣既吧搵佢,連女同吧都唔放過...」
「女同吧?」我好似喚起左一啲記憶,「你擺個唔笑好串個樣嚟睇下...」
「咩呀?咁呀?」果然...
「嘿...眾裡尋她千百度,驀然回首,那人卻在燈火欄柵處!」
「做咩咁好詩意呀?」
「感慨啫...話你知丫...」我將布袋張啤牌攞出嚟,係張普通牌,「其實我無贏你...」
「你...嘿...佢都試過用咁既方法呃我...你地兩個真係好似...」
好似...但唔係佢...